Dende la organización nacionaliega piden tamién que se depuren responsabilidaes y se compense a los asturianos por 40 años de cobros abusivos.
“El peaxe del Güerna ye más que un robu: ye’l símbolu d’una rellación desigual, d’una falta de respetu y d’un modelu territorial qu’asfixia a Asturies. Agora, cola Xunión Europea dándomos la razón, ye’l momentu d’actuar con firmeza, dignidá y determín”.
El postrer dictame emitíu pola Comisión Europea, que da un ultimatum al Estáu español pa desaniciar la prórroga de la concesión, confirma lo qu’Andecha Astur lleva años denunciando: el peaxe del Güerna ye illegal ya discriminatoriu pa cola ciudadanía asturiana.
Andecha Astur sofita la reclamación interpuesta por Ripa y denuncia públicamente la persistencia del peaxe del Güerna como “un exemplu de discriminación territorial, espoliu económicu y subordinación política que vien careciendo Asturies dende hai más de cuatro décades”.
Magar a la denuncia presentada nel añu 2021 pol entós diputáu asturianu y gracies a la presión fecha sobre’l tema dende Asturies, la Comisión Europea vien d’emitir un dictamen motiváu nel que considera que la prórroga de la concesión d’esplotación de l’AP‑66, acordada pol Gobiernu español l’añu 2000, vulnera la normativa europea de contratación pública y competencia, calificando esta prórroga como una modificación del contratu, equivalente a una nueva alxudicación, tramitada ensin concursu públicu, ensin publicidá y ensin respetar los principios de tratamientu igualitariu y transparencia que desixe’l drechu comunitariu.
Europa da agora un plazu de dos meses –fasta’l 17 de setiembre de 2025– pa que l’Alministración española corrixa la situación. De nun facelo, llevará’l casu al Tribunal de Xusticia de la Unión Europea, lo que podría derivar en sanciones económiques pal Estáu.
Dende Andecha Astur faen notar que l’AP‑66 ye la única vía d’alta capacidá que comunica Asturies cola Meseta, siendo una infracadarma esencial pal tráficu comercial, profesional y personal. “El peaxe nun solo supón un sobrocostu intolerable pa miles d’usuarios diarios, sinón qu’actúa como barrera al desendolcu económicu, l’actividá empresarial y la vertebración territorial del país”.
Andecha Astur desendolcó tamién, a lo llargo d’estos años, delles campañes y movilizaciones sol llema ‘Peaxe non, ¡ye un robu!. Agora reclamen, non solo la supresión dafechu del peaxe del Güerna, sinón la depuración de responsabilidaes polítiques y xurídiques sobro esa concesión y prorroga illegales, con una compensación económica pa los asturianos por más de 40 años de cobros indebios, asina comu la puesta en marcha d’un plan d’inversión n’infracadarmes que ruempa col aisllamientu interior ya interior que carez Asturies.
Llucía F. Marqués
This work is licensed under a Creative Commons Attribution 4.0 International License.
