Llucía F. Marqués
La cartelería d’estacionamientu de bicis de la estación de Xixón apaez en castellán, inglés y gallego; n’asturianu, non.
Llamentablemente, n’Asturies tamos avezaos a que la rotulación nel nuesu idioma nun te presente na mayoría de la cartelería, nin pública nin privada. Tan n’español, que pa eso ye la llingua l’imperiu. Entamamos a avezanos tamién a que l’inglés acompangue al español, ya sabeis, pol aquel del turismu y tal, porque seique l’inglés tampocu seya oficial n’Asturies hai que facese entender pol restu’l mundiu, que los turistes vienen a dexar perres y van sacanos de probes y blablablá, bien llegáu Mr. Marshall.
Lo que ye novedá ye velo en gallego. Nun tamos falando d’eonaviego nin de la estación de Vegadeo, esto ta na estación de trenes de Xixón, na cartelería d’anuncia de los aparcamientos pa bicis, y sinceramente, dudamos de que’l turismu gallegu xustifique l’esfuerciu.
Nun ye l’únicu casu: nos viaxes Madrid-Xixón nel AVLO pue sentise la megafonía de fin de viaxe nos mesmos tres idiomes, español, inglés gallego.
Agora la mio duda ye la viniente. ¿Trátase de que’l gallegu s’esparda comu idioma internacional? ¿Colonialismu gallegu? ¿Asturfobia? ¿O a cencielles esiste una desinformación tan tremenda sobre l’asturianu, agravada pol usu del pallabru ‘galleguasturianu’ pa referise al eonaviego, que les empreses foriates realmente creen qu’asturianu y gallegu son la mesma cosa? ¿A vosotros que vos paez?.
A mi, sinceramente, lo que me paez ye qu’esto, con Oficialidá, nun pasaba.
This work is licensed under a Creative Commons Attribution 4.0 International License.
