Bonos díes, bona xente.
Alborecemos con escasa nubosidá, sicasí hai dalgún estrato na fastera central asturiana con unes temperatures que tan alrodiu de los 13ºC, rexistrándose nel puirtu Payares 6,1ºC.
Güei vamos tener un aumentu de la nubosidá baxa o estratificada que mos dexará’l día nuble con unes temperatures que camudarán poco, calteniéndose un ambiente suave con másimes que malpenes algamarán los 20ºC. L’aire sedrá de componente norte con dalguna racha moderada nel llitoral y zones espuestes.
Mañana xueves vamos tener un día mui asemeyáu con nubosidá estratificada na mayor parte d’Asturies, salvándose como ye vezu les cumes de la cordelera y la fastera más surocidental d’Asturies. Les temperatures camudarán poco y l’aire sedrá del norte con dalguna racha moderada na costa y zones altes.
El vienres escamplará ya tendremos un día perguapu y soleyeru pero sin pasar calor con temperatures másimes que tarán alrodiu de los 20ºC con vientu del norte-nordés que volverá a ser cafiante nel llitoral y zones espuestes.
El sábadu y domingu paez que subirán dalgo les temperatures y nel cielu tendremos dalgún intervalu de nubosidá estratificada entemecida ente grandes claros o abancios, tando más escampláu hacia la cordelera y fastera más surocidental d’Asturies.
Que paséis un bon miercoles collacies ya collacios.
Semeya que mos l’apurre’l nuesu collaciu Lluis Alfredo dende Fayacaba, onde les vecines de la contorna ficieron una protesta escontra la esplotación minera nel cordal de Peña Mayor
This work is licensed under a Creative Commons Attribution 4.0 International License.
