Alborecemos col cielu cubiertu y lloviendo, sicasí na fastera más ocidental d’Asturies nun lo fae y yá tienen grandes claros o abancios nel cielu con unes temperatures que tan alarodiu de los 12ºC, rexistrándose nel puirtu Payares 3,6ºC.
Güei durante la mañana van dir remitiendo les precipitaciones d’oeste a este anque’l cielu va caltenese nuboso con unes temperatures que van camudar poco o subir llixeramente. L’aire sedrá de componente norte sele en xeneral.
Mañana vienres tendremos el cielu poco nuboso o escampláu con un ascensu de les temperatures anque l’aire nordés que va soplar cafiante pela costa y zones espuestes baxará la sensación térmica.
El sábadu alboreceremos ente’l borrín y la nublina na fastera central asturiana, pa dir dixebrándose a lu llargu la mañana y dexanos un día poco nuboso o escampláu, sicasí’l cielu pue tar empuercáu por dalgo de nubosidá alta pela tarde con unes temperatures que siguen n’ascensu a pesar del nordés que’n puntos del llitoral soplará cafiante.
El domingu va tar poco nuboso o escampláu con nubosidá de desendolque pela tarde que pue dexanos dellos xarabatos de calter tormentosu en zones de montaña al atapecer con unes temperatures en bultable ascensu yá que’l vientu nordés tiende a remitir pa quedar sele ya variable.
Que paséis un bon xueves collacies ya collacios.
This work is licensed under a Creative Commons Attribution 4.0 International License.
