Miles de persones reclamen n’Uviéu una Oficialidá de plenu drechu

11 Mayu, 2025

Los asturianos pasemos ya per munchos abusos nel tarrén llingüísticu pa conformanos con menos que con una Oficialidá vraera, integra, al cien por cien, por que los drechos nun almiten porcentaxes nin amabilidaes pa col amu, los drechos tiénense o nun se tienen y los asturianos queremos tenelos

Asturies nun se rinde, los asturianos tenémoslo claro, los drechos nun se negocien, desíxense. Ya pasemos pela imposición xabaz del español, la represión direuta ya en munchos casos violenta de los asturfalantes, demientres la dictadura, la posterior represión, quicias non tan violenta pero igual de direuta, de los sucesivos gobiernos del PSOE n’Asturies, pasemos pel insultu, el dispreciu, les torgues, los castigos… pa llegar ya cansaos y cola llingua fería a la represión discreta, combinada con promeses, que tan bien remanen Barbón y asociaos, comu bien s’apuntó na intervención final del manifestamientu. Llegaos a esti puntu nun queda más que siguir, y siguir hasta’l final.

Nun vamos lloramicar, pidigüeñando colos pantalones baxaos, planes y lleis valeros ya incumplios, non vamos conformanos con una Oficialidá restrinxía, desiximos pa los asturianos plenos drechos, n’igualdá con otres llingües y nun vamos permitir retayos de conteníu al conceutu llegal mesmu d’Oficialidá; ayeri desixímoslo nes cais, por miles, con banderes, con pancartes, con glayios, con panderetes, otra vuelta, y les que faigan falta. Por que tan avisaos, nun vamos rendinos, nun vamos conformanos.

Oficialidá