Canciaba Lliberdón nel 1997 aquello de “Tamos fartos de glayar, l’asturianu llingua oficial”, yá llovió dende entós. Afortunadamente, nun tamos fartos, seguimos glayando. Por que los drechos nun se rueguen nin se negocien, desíxense

Mañana volvemos a la cai, al manifestamientu que lleva camín de mediu sieglu desixendo’l respetu de los drechos llingüísticos de los asturianos, ello ye, la Oficialidá de la llingua. Otra cita n’Uviéu pa reclamar la Oficialidá, un manifestamientu que se presenta ensin los grandonismos y falses promeses d’aquel  ‘2019, la cabera mani pola Oficialidá’  , coscientes de que pasó ya la temporada del xugar coles esperances de los asturianos. y sabiendo que pocos creen ya nes promeses al aire que llevaron a Adrián Barbón a la presidencia, aquel “Oficialidá, agora si” que foi agora non.

Agora sabemos que l’únicu camín ye la presión que los asturianos faigamos desixendo los nuesos drechos, fasta que nun tengan más remediu que reconocénoslos. Eso vamos facer, manifestándomos mañana, si, pero tamién nel díi ente díi, falando n’asturianu, escribiendo n’asturianu, votando n’asturianu, desixendo que se cumpla siquier la ruina llegalidá del Plan d’Usu, denunciando ca abusu, ca discriminación, pero sobre tou, desixendo a los políticos que nos gobiernen que se dexen de cuentos, que valió d’esculpies, de rodeos, de retrasos. Oficialidá, darréu. 

Mañana, a les doce del mediudíi, na Estación de Renfe d’Uviéu. Vémonos. 

This work is licensed under a Creative Commons Attribution 4.0 International License.