Andecha Astur lleva tiempu reclamando la Soberanía Enerxética asturiana, pa nun depender de les arbitrariedaes y la incompetencia española y de les grandes multinacionles enerxétiques, reclamando una rede llétrica nacional y l’aniciu d’una empresa llétrica pública asturiana
Ayeri vivióse una xornada de, como mínimu, desconciertu. La desinformación más absoluta, demientres y depués del apagón, dexa a toos con un resquemor incómodu, munches entrugues que naide paez querer retrucar ya’l mantra repitíu -a posteriori- de que’l sistema lléctricu español desconectóse del sistema européu por Francia.
Primeres entrugues. ¿Por qué’l sistema español depende del de Francia? ¿Por qué’l sistema asturianu depende del d’España?
L’añu pasáu, en Teverga, l’economista David M. Rivas Infante de la man d’Andecha Astur facía rescamplar la emportancia de la soberanía enerxética, en tantu la capacidá d’un país pa controlar los sos propios recursos enerxéticos y satisfacer la so demanda d’enerxía, de forma caltenible, venceyándola a la soberanía política y alimentaria y reclamando esi drechu p’Asturies. La perda de soberanía enerxética ye una cuestión puesta enriba la mesa va tiempu por Andecha Astur, reclamando la Soberanía Enerxética asturiana pa nun depender de les arbitrariedaes y la incompetencia española y de les grandes multinacionles enerxétiques, asina como una rede llétrica nacional y l’aniciu d’una empresa llétrica pública asturiana.
Otra cuestión ¿Ye de xacíu plantegase gastos militares cuando, comu vien de demostrase, nun hai infracadarmes básiques que merezan un mínimu de garantía a la población? y una más, ¿nun foi mui oportuna, esta insólita avería? cola población somorguiada nuna dinámica de sustos apocalípticos y llerza bélica, con Bruseles proponiendo ‘kits de supervivencia’ y los medios abonando l’esmolecimientu pa favorecer l’aceptación d’inversiones millonaries nos exércitos, esti apagón nun dexa de ser un espaldarazu a les polítiques del miéu coles qu’España y Europa remanen a la población al so gustu.
Llucía F. Marqués
This work is licensed under a Creative Commons Attribution 4.0 International License.
