El xuráu aconceyáu ayeri decidió que la sidre que meyor entama la temporada ye la de La Morena, que se convierte asina por segundu añu na sidre protagonista de la Primer Sidre l’Añu
Les deliberaciones allargáronse más de lo que s’esperaba y los xueces tuvieron d’enfotase muncho pa escoyer les tres meyores d’ente les seis sidres que pasaron a la final d’esti renomáu concursu nel que s’escueye la sidre que meyor ta recien corchada, la primera del añu. El bon nivel de les sidres finalistes llevó a unes puntuaciones mui axustaes que dexaron un empate duple, per un llau pente’l tercer y cuartu puestu y pel otru pente’l primeru y segundu, polo qu’hebio de facer una tercer ronda de desempates anantes d’alcordar que la meyor ye la de La Morena, quedando segunda nel desempate Prau Monga, de Viuda de Angelón. Per detrás d’elles, llucharon pol tercerpuestu les sidres de Piñera y Cabueñes, algamando’l premiu la segunda.
Demientres el concursu, los llagareros finalistes, aconceyaos pa la ocasión na Sidrería La Montera Picona de Ramón, siguieron la evolución del mesmu nunos paneles d’espaldes al xuráu, de manera que anque’l públicu sabía que sidre se puntuaba en ca momentu, los xuraos non.
La sidre de La Morena sedrá, poro, la oficial del XV Certame de la Primer Sidre l’Añu, que se cellebrará na Feria Muestres pente’l 17 ya’l 20 del 2024.
Llucía F. Marqués
This work is licensed under a Creative Commons Attribution 4.0 International License.
