Bonos díes, bona xente.
Alborecemos col cielu nuboso y vientu molestu ya con unes temperatures que tan alrodiu de los 15ºC, rexistrándose nel puirtu Payares 6,1ºC.
Güei tendremos intervalos nubosos cola posibilidá de dalgún xarabatu dispersu que sedrá más probable ya intensu nel llitoral oriental con unes temperatures en descensu ya col aire gallegu que va seguir soplando con fuercia baxando entovía más la sensación térmica amás de dexanos mui mala mar.
Mañana sábadu alboreceremos con escasa nubosidá o escampláu ya con unes temperatures mínimes baxes, pudiendo xelar feblemente en zones propicies de montaña. Durante’l día a pesar de la llume del sol nun calecerá muncho l’ambiente con unes temperatures másimes que malpenes pasarán los 20ºC. L’aire amenorgará pa quedar sele ya variable.
El domingu seguiremos esfrutando del sol pero con un ascensu bultable de les temperatures con másimes que sobrepasarán los 25ºC.
La selmana viniente paez que se presenta seliquina con dalgo de nubosidá baxa y temperatures suaves, pero esto yá lu diremos viendo.
Que paséis un bon vienres collacies ya collacios.
Semeya que mos l’apurre la nuesa collacia Mary Pandiella
This work is licensed under a Creative Commons Attribution 4.0 International License.
