@Eltiempunasturies

Alborecemos con dellos estratos entemecios ente claros o abancios con unes temperatures que tan alrodiu de los 15ºC, rexistrándose 6,9ºC nel puirtu Payares.

Güei les nubes de retención dirán acumulándose contra la cordelera, dexándonos el día nuble pela tarde na mayor parte d’Asturies, tando más escampláu alrodiu del cabu Peñes y costa ocidental y en zones altes de la cordelera, mentantu nes hores centrales del día predominarán los claros o abancios con unes temperatures en llixeru descensu ya col aire qu’amenorgará pa quedar sele ya variable.

Mañana llunes predominarán los grandes claros, tando más escampláu na costa y zones altes de la cordelera, esfrutando del sol na mayor parde d’Asturies con unes temperatures n’ascensu ya col aire sele ya variable pero con dalgo de nordés pela costa.

El martes tendremos un tiempu mui asemeyáu col cielu más escampláu na costa centru-ocidental y zones altes de la cordelera ya con nubes ya claros o abancios nel restu, sicasí a últimes hores aumentará la nubosidá baxa na mayor parte d’Asturies con unes temperatures que van caltenese mui suaves ya col aire que sedrá sele ya variable con delles brises pela costa.

El miércoles paez que los borrinos y nublines del alborecer van ser persistentes y puen dexanos dalgo d’orpín con un descensu de les temperatures másimes pero esto yá lu diremos viendo.

LA MAR:

La temperatura del agua del Cantábrico sigue estando alrodiu de los 21ºC pero cola mar hai que tener precuru, tenemos unes foles significatives de 1,4m d’altor siendo la pleamar a les 16:49h.

Que paséis un bon domingu collacies ya collacios, nosotros mos despedimos hasta’l 24 de xunetu que tengáis una bona selmana.

Semeya que mos l’apurre’l nuesu collaciu Pachu Armesto Hevía del cabu Busto.

This work is licensed under a Creative Commons Attribution 4.0 International License.