La concentración escontra’l polémicu autobús transfobu taba convocada n’Uviéu, pero’l primer recibimientu tuviéronlu na so primer parada nel país, que ficieron pa repostar na gasolinera de Villayana onde un grupu d’emuladores de Pelayo recibiéronlos a pedraes

La intención del grupu ultracatólicu HazteOir, qu’aportó esta mañana a Asturies ye la  d’esparder pel país el so mensaxe intolerante pa cola diversidá d’opciones sesuales. La so parada taba prevista n’Uviéu, onde taba convocada una concentración de refuga y tratando de torga-y la circulación pela capital.

Pero ya anantes d’aportar a Uviéu tuvieron un potente alcontronazu cola oposición a les sos idegues amosada polos asturianos. El que ya se conoz como “l’autobús del odiu” camudó’l so percorríu anicial, que pasaba pela gasolinera de Parque Principado na Carretera de Viella col envís d’esquivar les concentraciones convocaes nesi puntu, pero la noticia aportó a los convocantes, que foron a recibilos fasta la Pola L.lena.

Demientres la xente protestaba pola so presencia ya’l so discursu, dellos amazcaraos llanzaron piedres escontra l’autobús, xenerando  una fería na tiesta al conductor y daños materiales que ya foron denunciaos pola xente d’HazteOir.

Finalmente la presión ciudadana torgó’l pasu del autobús, que tuvo de tornar pa Madrid con una lluna rota ya ensin entrar n’Uviéu.
La concentración convocada na Casa Conceyu cellebróse igualmente, aprofitando la ocasión pa remembrar a los dirixentes políticos que “La realidá ye diversa y que los drechos deben cubrir les necesidaes esenciales d’una sociedá diversa. Lo contrario ye una norma social que encaxona y llenda les realidaes”. (XEGA)

                                                                                                 Llucía Fernández Marqués

This work is licensed under a Creative Commons Attribution 4.0 International License.