Un añu más la sociedá asturiana ta llamada a salir a la cai a reclamar los sos drechos llaborales y sociales

El mensaxe qu’esti añu unvía la convocatoria de movilizaciones incide nos milenta motivos que los asturianos tenemos pa reaccionar y salir a protestar. Precariedá llaboral, retayos en servicios sociales, paru, probitú, emigración forciada y, en resume infinidá de torgues pa llevar una vida digna nel nuesu país.

Dende Andecha Astur ya’l bloque soberanista reclamen amás qu’esti seya un díi de llucha enfotáu na clas trabayaora asturiana, destacando la importancia de que les alternatives se costruyan dende Asturies y p’Asturies, “Fuxendo de discursos, igües o proyeutos que vengan prefabricaos dende fuera y nun atiendan a la realidá concreta del nuesu pueblu”.

“Vivir y trabayar  n’Asturies y faelo nunes condiciones afayaices ye una reivindicación innegociable” destaquen n’Andecha Astur, que consideren que la movilización social y la rempuesta na cai son necesaries “Frente a les polítiques del estáu español esfarrapando’l nuesu texíu económicu y condergándomos al paru, la precariedá llaboral y la emigración.”

Los soberanistes unvíen tamién un mensaxe a los sindicatos asturianos: “A los sindicatos de clase desixímos-yos que sigan siendo un preséu al serviciu de les trabayadores y seyan una ferramienta de lliberación social, pa lo cuál n’Asturies ye preciso nun escaecer la opresión nacional del nuestru pueblu.”

Poro, llamen a la población asturiana a participar nel manifestamientu entamáu por CSI, CXT, CNT y SUATEA, que saldrá a les 12:30 hores dende la Plaza L’Humedal de Xixón.

This work is licensed under a Creative Commons Attribution 4.0 International License.