La desconvocatoria a traición de la esitosa Fuelga navidiega por parte de los sindicatos mayoritarios y la posterior represión a les participantes nes movilizaciones condicionó unes negociaciones perdies d’antemán poles trabayaores

Les cientrales sindicales renunciaron a los dos principales puntos que dieron llugar a les fuelgues d’Avientu: venti menutos pa tomar el café computaos dientro la xornada llaboral y la subida de nivel profesional dende el puntu de vista salarial de magar los cuatro años nel seutor, daqué que meyoraría sensiblemente los misérrimos sueldos que perciben.

Un díi más de descansu al añu -que nun seya en nadal-, l’incrementu de 11 a 17 los díes de permisu de llactancia, que los permisos por fallecimientu de familiar computen de magar el primer llaborable y la posibilidá d’escoyer pente cobrar los festivos trabayaos o camudalos por otru díi de descansu, xunto con una subida de salarios que sedrá del 2’15% esti añu, que ya venía parcialmente forciada pol incrementu del S.M.I., son los “ésitos” algamaos nesti prealcuerdu de USO, UXT y CCOO cola Asociación de Supermercados del Principado de Asturies (Asupa).

Los alcuerdos aceutaos condicionen el conveniu llaboral del seutor dica l’añu 2023, fecha prevista pa la prósima negociacion del conveniu coleutivu.

Llucía F. Marqués

This work is licensed under a Creative Commons Attribution 4.0 International License.