El políticu, incorporáu a la formación morada va pocu, tien tres de so un ampliu historial de cambios políticos y situaciones polémiques
El tema saltó a la lluz nos caberos conceyos de los Comités Autonómicos y Territoriales de Podemos Asturies, cuando se pidieron desplicaciones ante la Comisión de Garanties del partíu pol cambiu de la llista elleutoral a favor de Rafael Palacios, recién incorporáu a la formación, retrasando un puestu a Jara Cosculluela, Co-Secretaria d’Organización de Podemos Asturies y reconocía militante feminista, que quedare por elleición popular nel cuartu puestu nes primaries convocaes pa entamar la candidatura asturiana. Esti intercambiu ye daqué esplicitamente imposible, acordies al reglamentu de Podemos, ya que la confeción de la llista ye competencia intrasferible de l’Asamblea Ciudadana Autonómica. Rafael Palacios nun fexo dala declaración al respeutu y la executiva nun dió más desplicaciones que la de que se trató “d’un alcuerdu priváu pa intercambiar puestos”.
La hestoria política de Rafael Palacios nun ta esenta de polémica: tres de la so espulsión d’Andecha Astur entamó INA (Izquierda Nacionalista Asturiana) y más alantre, xunto col PCPE (Partido Comunista de los Pueblos de España) ya IAS (Izquierda Asturiana), la coallición Bloque de la Izquierda Asturiana, que se desmembró al pocu comu consecuencía de los ruinos resultaos elleutorales algamaos y pola decisión que Palacios tomó entós d’acomuñar con IU, creando el Bloque por Asturies, col que finaría por formar parte del gobiernu d’Álvarez Areces comu Direutor de l’Axencia de Cooperación al Desarrollo del Gobiernu d’Asturies 2.003 – 2.007.
Nuria Prendes
This work is licensed under a Creative Commons Attribution 4.0 International License.
