Una docena de cientros de secundaria de Xixón participaron esta mañana nos Alcuentros cola Llingua Asturiana, nel Muséu’l Pueblu d’Asturies

Alrodiu de 500 escolinos del conceyu que tienen llingua comu asignatura optativa tuvieron güei una clas estremada: música, esportes tradicionales, baille, caraoque… una mañana d’arruelu pel prau ya’l Tendayu del Pueblu d’Asturies, cola collaboración de l’Asociación cultural Esbilla y dellos músicos de los grupos Dixebra y La Tarrancha

Esti añu’l tiempu dio un respiru y los rapacinos foron pasando d’una actividá a otra dica les doce’l mediudíe, onde tomaron el tiempu xustu pa xintar daqué anantes de llanzase a canciar col karaoke, probatiblemente l’actividá más esperada pola mayoría.

La emportancia d’estos alcuentros nun ta namás nel fechu de que los rapacinos lo pasen bien y vean la nuesa llingua como d’usu normal n’actividaes estremaes de les académiques, sinón nel aconceyamientu con cientos d’estudiantes de la so mesma edá que comparten l’enfotu pola llingua llariega.

Llucía F. Marqués

This work is licensed under a Creative Commons Attribution 4.0 International License.