Cola aprebación ayeri del decretu que reconoz la toponimia tradicional de les Regueres, son ya namás 17 los arrezagaos pendientes d’iguar los sos nomes. Sicasí, l’aplicación de la mesma en dalgún de los conceyos nos que ta reconocía dexa enforma que deseyar

Nesti intre son ya 61 de los 78 conceyos asturianos los que finalizaron el procesu d’oficialización de los sos topónimos, que permite revertir la españolización de los mesmos carecía demientres el franquismu. Llegalmente, de magar la espublización nel BOPA del decretu toponímicu (que nel casu Les Regueres fadráse nos prósimos díes) l’alministración tien la obligación y los ciudadanos el drechu d’utilizar los topónimos tradicionales, que son agora los oficiales.

N’otros 7  tienen el procesu de recoyida d’información enforma alantráu y prevése qu’a lo llargu del añu se presenten oficialmente; son Uviéu, Cabrales, Llanera, Castropol, Cuaña, Onís y Somiedu.

Nel otru estremu, el más retrasáu ye’l Conceyu d’Eilao, nel que gobierna el PSOE, que tovía ta aniciando el camín. Pel mediu alcontramos a los nueve restantes: Cuideiru, Ayande, Caravia, Ibias, El Valle Baḥu de Peñamellera, Salas, Navia, Pravia y Muros.

Una bones los topónimos son oficiales, les indicaciones nes carreteres, cartelería pública y comunicaciones de l’alministración tienen la obligación de recoyer como mínimo el nome asturianu, pudiendo, si asina lo consideren necesario, incluyir la versión billingüe.

Nuria Prendes