• Portada
  • >
  • Opinión
  • >
  • Violencia de les fuerces del “orde”: non solo en Cataluña

Violencia de les fuerces del “orde”: non solo en Cataluña

  • 2 Ochobre, 2017

De  como n’Asturies conocemos bien a les fuercies del estáu y la importancia de tener medios de comunicación propios y eficientes que cunten lo qu’asocede nel país

 Llucía F. Marqués

Les imaxes de lo asocedío ayeri en Cataluña dan la vuelta al mundiu, causando un más que xustificáu plasmu y alarma na población nacional ya internacional. La violencia de baldre y l’asañamientu de les fuercies españoles del orde contra la población civil nun pueden dexar indiferente a naide. Sicasí resúltennos tremendamente cotidianes a los asturianos.

Nun escaezamos que nos enfrentamientos polos derechos llaborales los asturianos perdimos brazos, güeyos y vides, ante’l silenciu cómpliz de los medios de comunicación y l’indiferencia –o’l desconocimientu- del restu del mundiu.

Remembrábenmelo ayeri les mios amistaes, reviviendo los auténticos estaos de sitiu vivíos: “Alcuérdate cuando pasó equí –Mieres-, una selmana zarraos en casa, cola policía viniendo de nueche a romper los portales, a tirar pelotes a los neños que salíen de clase, xente na UVI” “Escondíense detrás d’un muriu de la RENFE si se xuntaben más de 4 a falar salíen boles de nun se sabe u…asi nun se, cuantos díes taremos, una selmana igual, nun podíes salir seguru, nun los víes pero taben y dicíen “asturianos, folganzanes, fíos de puta”

O esta otra, dende la Pola L.lena “Llegaben mancaos a la mio casa, porque’l mio hermanu ye médicu, a que los atendieren, veníen sangrando, llorando, con güesos rotos y güei paez que nun s’alcuerden ” o dende Xixón:

“Tu y yo sabemos perfechamente que los de güei  fueron moderaos, porque vivimos dende bien pequeñines los enfrentamientos cola Naval al llau de casa”  y otra vegada dende Mieres “A mi pegáronme por meteme a defender a una nena que-y taben Dando. Yera síndrome de down o algo asina! Non habida dengún lio, andaba sola pela cai” y recordando tamién el 15 M “escorríennos hasta la puerta mesma del autocar, pegándonos toletazos mientres intentábemos xubir; igual que los grises”. Podría siguir asina hasta mañana. La mio propia esperiencia podría apurrir numberosos relatos capaces de poner los pelos de punta, y siempres participé nes movilizaciones de manera hiper-pacífica, prométolo. Ayeri mesmu hebio una carga policial contra manifestantes n’Uviéu.

Sicasí la esperiencia asturiana de la represión policial malpenes ye conocida y cuerre incluso’l peligru de ser escaecida. A cencielles, nun cunta cola atención mediática que Cataluña supo atraer.

Por tou ello ye imprescindible que los asturianos cuntemos cola nuesa propia voz, que cunte al mundu lo que pasa equí y dexe de despintar la nuesa realidá, sacando los nuesos conflictos y lluches a la lluz , al traviés mediu de comunicación nos que, como n’InfoAsturies, podamos atopar información díi ente díi.

This work is licensed under a Creative Commons Attribution 4.0 International License.

Dexa una rempuesta

La so direición de corréu lleutrónicu nun sedrá espublizada. Los campos precisos tan marcaos *

Este sitio emprega Akismet para reducir o spam. Aprende como se procesan os datos dos teus comentarios.

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies. ACEPTAR

Aviso de cookies