La posibilidá de cancelar reclamaciones, frenar deldes y recuperar dineru yá pagao abre una vía de reparación, pero nun borra les privaciones nin l’angustia carecíes por mor de la mala xestión d’una prestación destinada a garantizar la subsistencia y que tendría de dar seguridá, información clara y protección efectiva a quien depende d’ella.
Cientos d’asturianos vieron con sorpresa esti mes cómo nun se-yos retiraba del bancu la «delda» que cada mes se-yos resta de los sos yá exiguos ingresos pa pagar los errores d’una alministración ineficiente. Naide los informara del motivu, pero los cobros tán suspendíos mentanto l’Alministración concreta cómo va xestionar la so obligación d’anular deldes ya inclusive devolver perres por reclamaciones indebíes. Dende esti vienres, 23 d’ochobre, les persones afectaes por determinaes reclamaciones del salariu social básicu pueden solicitar la revisión de los sos espedientes. La midida protexe a quienes actuaron de bona fe y comunicaron los cambios na so situación, pero siguieron recibiendo pagos por retrasos o errores de l’Alministración. L’apertura del procedimientu llega dempués d’años nos que les deldes convirtieron unes prestaciones de subsistencia nuna fonte añadida d’inseguridá económica.
El problema venía señalándose dende la puesta en marcha del Ingresu Mínimu Vital. El trespasu ente prestaciones, les demores na actualización de los espedientes y les reclamaciones retroactives dexaron a families ensin recursos ante devoluciones de miles d’euros, obligando a persones que malpenes podíen cubrir les necesidaes básiques a devolver unes perres que yá gastaren en sobrevivir. Porque, seamos sinceros, los importes d’estes ayudes nun dan pa vivir y les cantidaes «extra» nun arriquecieron a naide: el dineru reclamáu yá se destinara a comer, pagar suministros o sostener una vivienda. La propia reforma llegal reconoz que treslladar les consecuencies del mal funcionamientu alministrativu a persones vulnerables pue imponer una carga desproporcionada.
Nuna economía de subsistencia, afrontar una delda significa quitar recursos de necesidaes inmediates. La presión nun termina nel saldu bancariu: afecta a la seguridá del llar, a la salú y a la capacidá de salir de la probitú. Les organizaciones d’afectaos vienen denunciando que les reclamaciones agraven precisamente les situaciones que les prestaciones teníen de remediar.
Destaca la llentitú cola que se tomó esta decisión: Andecha Astur yá reclamó’l 14 d’abril de 2021 la condonación de les deldes derivaes del pagu simultaneu del salariu social y l’IMV. Denunciaba que les persones más desfavorecíes tuvieren que responder pola mala xestión del trespasu y desixía que l’Alministración asumiera la responsabilidá. Tamién reclamó tresparencia sobre’l destín de les cantidaes recuperaes y que permanecieren dedicaes a fines sociales.
La revisión que s’abre agora tendrá de midise poles deldes anulaes, les devoluciones efectivamente pagaes y la rapidez de les resoluciones, nuna cuestión na que l’Alministración tendría d’actuar d’oficiu, pero nun lo va facer. Pa les persones afectaes, la reparación nun pue quedar n’otra espera alministrativa.
Información práctica
Si te reclamen dineru del salariu social, puedes pedir que revisen la delda y que l’anulen si cumple les condiciones de la nueva llei. Si yá devolvisti parte o tol dineru, tamién puedes solicitar que te lo devuelvan.
La solicitú tien que presentase nun rexistru oficial, dirixida a la Conseyería de Derechos Sociales y Bienestar, al serviciu encargáu del salariu social. Nun basta con mandar un corréu electrónicu. Pa saber qué formulariu usar, qué documentos apurrir y ónde presentalos, puedes llamar al 984 01 57 91 o escribir a infosalariosocial@prestacionesasturias.es. Ties más información en Prestaciones Asturias.
Pa reclamar el dineru yá pagao, la llei da un añu de plazu, contáu dende’l 29 de setiembre de 2026. Nos casos previstos, los cobros pueden quedar suspendíos mentanto se revisa l’espediente. Sicasí, hai esceiciones: la reforma nun permite reabrir obligaciones prescrites —ello ye, que se castiga a quienes enfrentaron la delda con rapidez— nin casos resueltos definitivamente por sentencia firme.
Esto afecta al salariu social asturianu. Si la delda te la reclama l’INSS pol IMV, tienes que reclamala per otra vía: esta reforma nun l’anula.
This work is licensed under a Creative Commons Attribution 4.0 International License.
