La propuesta de prohibir la pesca del salmón en 2027 y suspender la subasta del campanu llega dempués d’años de deterioru de la especie. La incertidume sobre la so recuperación obliga a mirar más allá de la perda d’una tradición: siguir pel mesmu camín pue acabar con ella definitivamente.

La Conseyería de Mediu Rural propunxo vedar la pesca del salmón durante tola temporada de 2027, una midida que supondría tamién suspender la subasta del campanu. El plantegamientu presentáu’l 19 d’ochobre nel Conseyu de los Ecosistemes Acuáticos y de la Pesca n’Agües Continentales abandona la esceición anunciada en xunetu, cuando entá se pretendía permitir la captura del primer exemplar de cada cuenca. La propuesta tien de completar la tramitación correspondiente pa incorporase a la normativa de pesca.

Ye una rectificación necesaria, pero llega sero; dicen que más val sero que nunca, pero nesti casu apuráronse les llendes al másimu y cuerre’l pelligru de ser un enxamás irreversible. La temporada de 2026 preslló con 108 salmones capturaos, un 18 % menos que l’añu anterior, según los datos del propiu Gobiernu asturianu. Les restricciones aplicaes hasta agora nun evitaron que la situación obligue a plantegar el cierre de la pesca.

La entruga ye si, a estes altures, la veda va ser abondo pa recuperar poblaciones viables nos ríos asturianos. La documentación consultada nun permite dar por fecha esa recuperación nin poner fecha a una vuelta a la normalidá. Dexar de pescar pue reducir una presión sobre la especie; nun garantiza por sigo solo que se revierta’l deterioru acumuláu.

El problema va más allá del anzuelu. La conservación del salmón obliga a atender al conxuntu del so hábitat y a les condiciones que precisa durante tol ciclu vital. Les denuncies sobre los riesgos del dragáu del puertu de Ribeseya recuerden precisamente la necesidá d’evaluar l’impactu de les actuaciones nes desembocadures sobre especies migratories como’l salmón.

La esceición pal campanu yá concentraba una contradicción evidente: reconocer que la especie precisa un descansu y, al mesmu tiempu, reservar una captura pa caltener l’espectáculu. Esa incoherencia taba nel centru d’ «El safari de los ríos asturianos», que cuestionaba una veda compatible cola pesca y la subasta del primer salmón.

Llamentar la suspensión d’una tradición ye comprensible. Lo esmolecedor ye reducir l’alderique a esa perda, como si’l campanu pudiere existir al marxe de la supervivencia del animal. Nesa mirada hai una forma d’alienación: defender el ritual ensin reparar nes condiciones naturales que lu faen posible, hasta’l puntu de considerar una amenaza la midida que pretende evitar la so desapaición.

Siguir pel mesmu camín qu’hasta agora lleva a un final irreversible: que dexe d’haber primer salmón porque yá nun quede una población capaz de volver a los ríos asturianos. La estinción llocal de la especie acabaría cola tradición ensin posibilidá de recuperala.

La preocupación vien de llueñe, como reflexaba la denuncia sobre la situación de la angula y el salmón. Tamién se cuestionó durante años la respuesta basada en eliminar mabees ensin apreciar una recuperación de los salmónidos.

A la propuesta de veda súmase otra decisión difícil de conciliar col reconocimientu de la crisis: el Gobiernu asturianu anunció que va solicitar al Ministeriu pa la Transición Ecolóxica que paralice la inclusión del salmón atlánticu nel Llistáu d’Especies Silvestres en Réxime de Protección Especial. 

This work is licensed under a Creative Commons Attribution 4.0 International License.