Les grades tiñéronse de mariello coles banderes de Brigadas Amarillas nel partíu ente’l Cádiz y el Sporting del domingu 11 d’ochobre. El colectivu cadista llevó al alcuentru la so revindicación, que combinó antifascismu, identidá andaluza y refugu al colonialismu

Brigadas Amarillas (brigaes marielles) ye un colectivu d’aficionaos del Cádiz CF con una llarga trayectoria d’animación y compromisu social. Los sos oríxenes remóntense a 1980, anque foi en 1982 cuando adoptó’l nome actual y s’asitió nel Fondo Sur del antiguu Ramón de Carranza. Dende entós, les sos banderes y pancartes convirtiéronse nuna seña reconocible del cadismu popular.

El mariello identifica’l so apoyu al equipu, pero la identidá de Brigadas va más allá de los colores esportivos. El colectivu defende posiciones antifascistes y antirracistes y tien participao en movilizaciones pola enseñanza pública, los astilleros y l’emplegu na bahía de Cádiz. La so concepción del fútbol ta venceyada a la vida de la ciudá y a les lluches de la so xente. 

Ente esi despliegue mariellu apaecieron tamién banderes andaluces, incluyía la verdi, blanca y verdi cola estrella collorada, utilizada pola izquierda soberanista ya independentista andaluza. Esta enseña xune la reivindicación nacional cola simboloxía de la llucha obrera.

Na viéspera del 12 d’ochobre, Brigadas desplegó amás una pancarta col lema «12 de octubre. Nada que celebrar», acompañada d’una bandera andaluza cola estrella colorada. Les banderes palestines completaron un mensaxe de solidaridá y refugu al colonialismu que trespasó la rivalidá deportiva. 

Dende Asturies, gracies a les andaluces y los andaluces de Brigadas Amarillas por facer de les grades un espaciu d’animación, conciencia y dignidá. Gracies por defender la identidá del vuesu pueblu y por caltener visible la solidaridá con otros pueblos. Más allá del resultáu del partíu, esa manera d’entender el fútbol merez el nuesu reconocimientu.

This work is licensed under a Creative Commons Attribution 4.0 International License.