Andecha Astur, Somos Asturies y Aína escueyen el 8 de setiembre pa marcar posición énte’l nuevu ciclu electoral, con trayectories y plantegamientos distintos sobre la construcción d’una alternativa política propia n’Asturies
El Día de la Nación Asturiana vuelve ser esti 8 de setiembre una xornada d’afirmación y debate políticu. Tres organizaciones —Andecha Astur, Somos Asturies y Aína— convoquen actos propios en Xixón y Mieres, aprovechando la carga simbólica de la fecha pa presentar proyectos, definir estratexes y preparase pa les eleiciones de 2027.
La coincidencia de les tres iniciatives confirma la existencia d’un espaciu políticu que reconoz Asturies como marcu específicu d’actuación. Pero tamién fai visibles les diferencies ente una organización soberanista con décades de trayectoria, una fuerza nacida de la crisis de Podemos y un partíu asturianista que lleva años en procesu de formación.
Nun momentu nel que’l ciclu electoral vuelve averase, les tres convocatories planteguen, directa o indirectamente, una mesma cuestión: cómo convertir la pluralidá de la izquierda asturiana nuna alternativa con capacidá pa intervenir na sociedá y algamar representación institucional.
Andecha Astur aconceya pa definir la so estratexa
La convocatoria con mayor trayectoria histórica ye la d’Andecha Astur. La militancia va aconceyar a les 12:00 hores nel llocal de la organización en Xixón nun Conceyu Estraordinariu convocáu p’analizar les próximes eleiciones nacionales y estatales y definir la so llinia política a curtiu y mediu plazu.
Andecha Astur ye la organización veterana del soberanismu asturianu y la única de les tres convocantes que lleva décades defendiendo de manera continuada’l 8 de setiembre como Día de la Nación Asturiana. La formación considera esta fecha un momentu d’afirmación nacional y de reivindicación del drechu del Pueblu Asturianu a decidir llibremente’l so futuru.
La organización parte d’una posición clara: Asturies ye una nación y la soberanía nun ye una declaración simbólica, sinón la capacidá efectiva de decidir sobre’l territoriu, la economía y los recursos propios. Dende esti plantegamientu va analizar agora les formes nes que pue intervenir nel nuevu escenariu políticu y electoral.
El Conceyu Estraordinariu va estudiar les condiciones nes que tendría sentíu participar nes eleiciones, les posibles fórmules de collaboración y la rellación col restu de fuerces soberanistes y d’izquierdes. Pero l’alderique nun va quedar reducíu al terrén electoral. Tamién va abordar les prioridaes de trabayu, la presencia social d’Andecha y la so intervención nos principales conflictos que carez Asturies.
Ente ellos, la organización señala la emigración forciada de la mocedá, la precarización del emplegu, la falta de vivienda, la turistificación, la destrucción del territoriu, la perda de capacidá industrial y l’ausencia de poder políticu pa decidir sobre los recursos del país.
Unidá d’aición ensin renunciar a les diferencies
Andecha Astur defende como estratexa política la unidá d’aición de la izquierda asturiana. La propuesta nun pasa pola disolución de les organizaciones existentes nin pola creación d’una estructura uniforme, sinón pola construcción d’un espaciu compartíu que respete la independencia, y les distintes polítiques y sensibilidaes de cada fuerza.
L’oxetivu sería superar la fragmentación y poner en común aquello que permita actuar de manera coordinada. Esa cooperación tendría d’ufiertar a la sociedá asturiana una alternativa política reconocible, con garantíes de representación y capacidá efectiva pa intervenir tanto nes instituciones como nos conflictos sociales.
Andecha entiende que la pluralidá nun tien por qué ser un impedimentu pa la collaboración. La existencia de cultures polítiques distintes pue convivir con alcuerdos sobre oxetivos nacionales y sociales compartíos, siempre que se respete l’autonomía de cada organización y que les decisiones se tomen n’Asturies.
La formación busca asina una unidá que nun seya namás electoral o coyuntural. La so propuesta apunta hacia una coordinación estable de la izquierda asturiana, capaz de combinar soberanía, transformación social y eficacia política.
Esta posición da continuidá a la trayectoria d’una organización que participó de manera constante nes movilizaciones del 8 de setiembre. Andecha impulsó, ente otres iniciatives, el referendu simbólicu pola soberanía de 2017, participó nes convocatories republicanes y soberanistes de 2018 y desendolcó la campaña «República Asturiana».
Somos Asturies estrena la so etapa como partíu
A la mesma hora, pero n’El Patiu! de La Llaboral de Xixón, Somos Asturies celebra l’actu «¿Ye lo qu’hai?». La cita va sirvir como presentación pública de la plataforma encabezada por Covadonga Tomé na so nueva etapa como partíu políticu.
Somos Asturies naz de la crisis interna de Podemos Asturies. Tomé llegó a la Xunta Xeneral como candidata de la formación estatal y, tres la so espulsión, pasó al Grupu Mistu. Alredor d’ella fueron incorporándose antiguos cargos y militantes de Podemos, ente ellos Xune Elipe, hasta configurar un proyectu que busca reagrupar l’espaciu de la izquierda asturiana.
La evolución dende Podemos hacia Somos Asturies supón un desplazamientu políticu y discursivu. La nueva formación presenta Asturies como marcu específicu d’actuación y busca referentes nes organizaciones que define como «izquierdes territoriales».
Somos Asturies reivindica una Asturies progresista, solidaria y con capacidá pa responder a problemes como la vivienda, la turistificación o’l deterioru de los servicios públicos. Sicasí, la organización nun asumió hasta agora una definición nacionaliega nin soberanista equivalente a la d’Andecha Astur.
La cuestión abierta ye hasta onde va llegar esta evolución: si Asturies va ser únicamente l’ámbitu territorial nel que desenvuelva la so actividá o si’l proyectu va reconocer una capacidá política propia que nun dependa de les estratexes estatales.
Aína anuncia la so entrada nel terrén electoral
La tercera convocatoria va desarrollase nel parque Xovellanos de Mieres. Aína convoca a les 13:00 hores un actu políticu, siguíu d’un conciertu de Rubén Bada y una xinta.
La formación considera que l’apertura del nuevu ciclu electoral obliga a dar un pasu alantre y defende la creación d’un «polu políticu propiu» pa Asturies. Nel so IV Congresu, celebráu en marzu, Aína acordó impulsar un espaciu electoral «d’obediencia y aición estrictamente asturiana», abiertu a incorporar persones y colectivos más allá de la estructura del partíu.
Aína define’l so nacimientu como una respuesta al sentimientu d’orfandá política d’una parte del asturianismu. Los documentos de la propia organización daten la so creación en payares de 2022. Darréu, en 2023, decidió nun participar nes eleiciones autonómiques y municipales, y en 2024 refugó presentase a les europees pa concentrar los esfuerzos na estratexa «Asturies 2027».
Agora asegura que’l momentu de participar electoralmente llegó. La convocatoria de Mieres abre esta nueva etapa y busca reforzar la idea d’un ‘polu asturianu’ capaz d’actuar con voz propia. Queda por concretar cómo va articulase esa propuesta y qué rellación va mantener coles demás organizaciones que trabayen nel espaciu de la izquierda asturiana.
Tres proyectos y una mesma cuestión de futuru
La coincidencia de les tres convocatories nel Día de la Nación Asturiana nun tendría de quedar nuna simple superposición d’actos. Amuesa que n’Asturies hai organizaciones y sectores sociales dispuestos a construyir alternatives polítiques propies, pero tamién evidencia una fragmentación que pue reducir la so capacidá d’intervención y les sos posibilidaes de representación.
Somos Asturies preséntase como partíu y busca l’apoyu de les izquierdes territoriales del Estáu. Aína anuncia que, dempués d’una primera etapa de construcción interna, ta dispuesta a dar el pasu a les urnes. Andecha Astur aprovecha la fecha pa revisar la so estratexa y defender la necesidá d’una unidá d’aición que respete les diferencies y la independencia de cada organización.
Les tres posiciones nun son iguales, pero compartan la constatación de que los problemes d’Asturies necesiten una respuesta política específica. La cuestión ye si esa coincidencia mínima va poder convertise nuna collaboración real o si cada proyectu va siguir desenvolviendo la so propia estratexa de manera separada.
Como yá ocurrió n’otros momentos, el 8 de setiembre vuelve amosar distintes formes d’entender Asturies y el so futuru políticu. Nesta ocasión, les convocatories miren directamente hacia 2027 y abren un alderique que va más allá d’una única xornada: cómo construyir una alternativa asturiana plural, representativa y eficaz, capaz de responder a les necesidaes del país.
This work is licensed under a Creative Commons Attribution 4.0 International License.
