Palestina, oficialidá, feminismo, diversidá LGTBIQ+, educación pública y Asturies conviven nel cartelu de Fiestes Populares Uviéu. Vox escandalízase; nós felicitamos a los autores por ser quien a resumir nuna sola imaxe bona parte de les causes que siguen necesitando defensa. Pero’l cartelu ye namás la portada: detrás hai otru San Mateo, popular, de baldre, asociativu y revindicativu, que lleva años resistiendo al modelu de fiesta mercantilizada del gobiernu municipal.

Hai que felicitar a quien diseñó’l cartelu de Fiestes Populares Uviéu. Non solo porque furrula visualmente, sinón porque consiguió una proeza de síntesis política: meter nun únicu espaciu práuticamente tolo que-y incomoda a la drecha española.

Palestina. L’arcu la vieya. La bandera trans. Feminismu. La bandera d’Asturies. La defensa de la educación pública. Y, por supuestu, la oficialidá de la llingua asturiana.

Viendo la reacción de Vox, podría dicise que dieron en centru.

La portavoz de Vox n’Uviéu, Sonsoles Peralta, mui molesta cola llibertá d’espresión, acusó a Fiestes Populares de convertir San Mateo nuna «plataforma de propaganda política», de querer facer de les fiestes una especie de «feria del activismu d’izquierdes» y anunció que va solicitar información sobre les autorizaciones, condiciones y posibles recursos públicos venceyaos a les cuatro casetes. La formación considera especialmente reveladores los símbolos de Palestina, la bandera trans, l’arcu la vieya y la oficialidá.

Resulta difícil pensar nuna campaña publicitaria meyor pal cartelu, porque la enumeración que fai Vox, más que una acusación, termina valiendo como índiz: drechos LGTBIQ+, solidaridá internacional, drechos llingüísticos, feminismu, servicios públicos, cultura propia. Precisamente cuestiones que nun apaecen ellí por casualidá nin porque a los organizadores se-yos ocurriera convertir esti San Mateo nuna improvisada convención política.

Son causes que formen parte del trabayu de los colectivos sociales que sostienen estes fiestes y de conflictos que siguen abiertos n’Asturies. Un país que sigue ensin una llei LGTBI propia que garantice plenamente la igualdá y la non discriminación; onde la revindicación feminista continúa denunciando les violencies machistes y les desigualdaes estructurales; nel que la defensa de la educación pública frente a la privatización sigue movilizando a organizaciones sociales y sindicales; y onde la solidaridá con Palestina nun ye precisamente una cuestión decorativa, como demuestra la movilización social continuada y les denuncies contra les relaciones de les instituciones asturianes con empreses venceyaes a la industria militar israelina.

Pero quedarse nel cartelu sería perder lo fundamental. Fiestes Populares Uviéu va volver esti añu ente’l 10 y el 21 de setiembre con cuatro casetes —tres en Porlier y una na plaza de la Catedral—, conciertos de baldre y actividaes sociales y culturales. La propuesta defínese como diversa, popular y revindicativa y plantega recuperar la participación ciudadana, les actividaes de baldre y la presencia de les asociaciones nes cais.

Los chiringuitos sociales formen parte de la historia contemporánea de San Mateo dende principios de los años ochenta. El modelu entamó n’Uviéu en 1983, inspiráu nes txosnes de Bilbao, y durante décades asociaciones culturales, sociales, esportives y polítiques participaron directamente nes fiestes.

El casu más conocíu, el Topu Fartón, históricu chiringuitu de San Mateo, que funcionó durante 33 años. Nacíu en 1984 y sosteníu a lo llargo del tiempu por distintos colectivos sociales, llegó a axuntar na so barra organizaciones como la Xunta pola Defensa de la Llingua Asturiana, SOS Racismu o Xente Gai Astur.

Vamos, que la combinación ente folixa y reivindicación social nun la inventó’l peligrosu diseñador del cartelu de 2026, ye, en realidá, una parte de la historia de San Mateo.

El conflictu vien d’otru llau: del cambéu del modelu festivu impulsáu nos últimos años pol gobiernu d’Alfredo Canteli.

Fiestes Populares lleva tiempu denunciando la desapaición de bona parte de los conciertos de baldre, la perda de los chiringuitos tradicionales y la sustitución d’un modelu con participación vecinal y asociativa por otru nel que’l públicu acaba convertíu, fundamentalmente, en consumidor.

En 2024 la plataforma, integrada por más d’una decena d’entidaes, calificaba’l modelu municipal de «fracasu absolutu», una crítica que nun se llenda a los movimientos sociales. Esti mesmu branu Rodrigo Cuevas cargó públicamente contra la privatización de San Mateo y afirmó que la perda de les fiestes populares convirtió la celebración nuna especie de «desiertu». La reacción de la conceyala de Festexos, Covadonga Díaz, foi llegar a poner en dulda públicamente si l’artista actuaría finalmente nes fiestes.

Pocos díes dempués, Canteli zarraba cualquier alderique sobre la recuperación d’ún de los símbolos del vieyu San Mateo: mientres él seya alcalde, afirmó, los conciertos nun van volver a la plaza de la Catedral.

Hai, por tanto, dos concepciones bastante distintes de qué ye una fiesta popular. Una entiende la ciudá como escenariu pal consumu, los conciertos de pagu y una programación diseñada fundamentalmente dende les instituciones y los intereses empresariales.

La otra reclama recuperar la cai como espaciu colectivu: casetes sociales, asociaciones, cultura gratuita, música, alderique, reivindicación y, sí, tamién folixa.

La presencia de Palestina nel cartelu tien amás una historia mui concreta: nel San Mateo de 2025, Fiestes Populares proyectó sobre la Catedral banderes palestines y mensaxes de solidaridá con Palestina y el Sáḥara Occidental, amás de crítiques al propiu modelu festivu d’Uviéu. La Policía Llocal ordenó apagar la proyección y identificó a cuatro persones, según denunció la organización.

Meses dempués llegó a plantegase la posibilidá de multes de hasta 3.000 euros y de retirar les autorizaciones de les casetes. Finalmente, l’espediente quedó archiváu y nun hebio sanción.

Agora la bandera palestina vuelve, pero esta vegada impresa nel cartelu xunto a los collores, la oficialidá, el feminismu, la bandera asturiana y la educación pública.

Vox diz querer un San Mateo «abiertu, popular y reconocible» nel que pueda participar cualquier persona piense como piense. La idega podría ser compartible si nun viniera acompañada precisamente del cuestionamientu de los símbolos y reivindicaciones que nun-y presten.

Una fiesta popular tampoco ye necesariamente una fiesta esterilizada de cualquier conflictu social. Les fiestes ocupen la cai, xeneren relaciones colectives, espresen identidaes y formen parte de la cultura d’una comunidá. Pretender que seyan «apolítiques» ye tamién una decisión política.

Poro’l méritu del cartelu de Fiestes Populares nun ye provocar a Vox, ye contar nun golpe de vista quién ta tres d’esi otru San Mateo.

This work is licensed under a Creative Commons Attribution 4.0 International License.