El Principáu acepta la quita de seis millones a Duro Felguera y prepara otra operación millonaria cola empresa, una hestoria especialmente ilustrativa de cómo cambia’l discursu del Gobiernu asturianu cuando una gran empresa entra en dificultaes, pero tamién fala de l’ablucante habilidá pa remanar la información pública con semeyes sorrientes y sutiles xiros que lleven, nesti casu, dende’l “van recuperase los seis millones” hasta el “vamos a poner esos seis y quince millones más

En 2021 el Gobiernu d’Asturies presentó los seis millones apurríos a Duro Felguera como dineru públicu destináu a salvar una empresa estratéxica y caltener l’actividá industrial. En xineru d’esti añu’l viceconseyeru d’Industria aseguraba que nun se daben por perdíos y que se reclamaríen. Dos meses dempués, l’Executivu descartaba reclamar el 100% y empezaba a falar d’un préstamu de “naturaleza privada”. La quita acabó homologada xudicialmente. Agora, colos seis millones ensin recuperar, el Principáu prepara la compra a la mesma Duro Felguera del taller de Barros, por una cifra que les informaciones asitien cerca de los 15 millones, pa ponelu a disposición d’Indra y de la fabricación de blindaos.

En 2021 nun había ambigüedá dala. El propiu Conseyu de Gobiernu anunció una “ayuda de 6 millones a Duro Felguera” col oxetivu de “preservar les sos capacidaes industriales y caltener l’emplegu”. La operación articulóse al traviés de la Sociedá Rexonal de Promoción (SRP), pero les perres salíen de los asturianos: l’Alministración transfirió seis millones a la SRP y ésta formalizó un préstamu participativu pol mesmu importe a Duro Felguera, con cinco años de plazu pa devolvelu. La memoria de la propia SRP definíalu ensin rodeos como “sofitu financieru del Principáu d’Asturies canalizáu al traviés de la SRP”.

Yá entós, la intervención pública pa salvar Duro Felguera xeneraba duldes sobre les garantíes reales d’actividá y emplegu. Los trabayadores denunciaben que, depués de recibir los primeros fondos, la empresa nun taba cumpliendo’l plan industrial comprometíu nin modernizando les instalaciones. La discusión, poro, nun yera si’l dineru yera públicu o priváu: yera qué obtenía Asturies a cambiu d’él.

La situación volvió al primer planu cuando Duro Felguera presentó’l so plan de reestructuración. La compañía pretendía aplicar una quita del 100% a bona parte de los sos acreedores, incluyendo los seis millones del préstamu concedíu al traviés de la SRP.

La primer reacción institucional foi contundente. N’ochobre de 2025 Adrián Barbón aseguraba que’l plan tenía que revisase con muncho rigor porque “coles perres públiques nun pue xugase”.

Na mesma llinia, en xineru de 2026 el viceconseyeru d’Industria, Juan Carlos Campo, retrucaba ensin ambigüedá cuando-y entrugaben polos seis millones: “Nun se dan por perdios. Reclamaránse”.

En marzu, el conseyeru d’Industria, Borja Sánchez, reconocía que reclamar el 100% del préstamu yá nun taba enriba la mesa. Paralelamente, el Gobiernu entamó a introducir una interpretación nueva: el préstamu yera agora de “naturaleza privada” porque formalmente lo concediera la SRP, una sociedá mercantil, y non directamente l’Alministración.

La explicación xurídica pue tener relevancia nel procedimientu concursal, pero políticamente produz una contradicción difícil d’ignorar: los seis millones que cuando se concedieron yeren una ayuda financiera del Principáu, financiada con fondos de l’Alministración y presentada como una apuesta pública pola industria, convirtiéronse en “privados” precisamente cuando llegó’l momentu de decidir si se recuperaben.

El cambiu resulta tovía más llamativu porque meses enantes la posición defendida dende Industria yera precisamente la contraria: que’l préstamu tenía orixe públicu y, por ello, tendría de quedar fuera de la quita. La contradicción llegó incluso a la Xunta Xeneral, onde se recordó al presidente que primero’l viceconseyeru prometiera reclamar les perres y el propiu Barbón reclamara rigor col dineru públicu.

Finalmente, el Tribunal de lo Mercantil homologó en xunu’l plan de reestructuración de Duro Felguera ya’l préstamu asturianu quedó dientro de la quita prevista pola empresa.

Hai un matiz xurídicu importante: si Duro Felguera incumple’l plan de reestructuración, los créditos afectaos pueden reactivase. Pero mientres se cumpla’l plan homologáu, los seis millones nun se devuelven al Principáu. El mesmu Gobiernu reconoció en xunu que’l créditu “queda como quita”.

La operación encaxa, amás, nuna reestructuración que contempla reducción de plantía, desinversiones y quites de delda y que yá provocara fuertes crítiques. En los planes de Duro Felguera calificaos d’“espoliu industrial” denunciábase precisamente la combinación de despidos, perdón de delda y venta d’activos d’una empresa histórica que llevaba años recibiendo sofitu públicu.

La secuencia resulta, polo menos, llamativa: una empresa privada considerada estratéxica recibe seis millones de dineru públicu pa garantizar la so viabilidá; cuatro años dempués pide nun devolver nin un euru; el Gobiernu pasa de prometer que va reclamalo a aceptar que la delda quede incluyida na quita, la empresa reduz la plantía y, malpenes unos meses dempués, la mesma Alministración vuelve a intervenir económicamente nuna operación destinada a dar salida a otru activu de Duro Felguera.

Porque’l casu de los seis millones nun acaba cola quita. Agora’l Principáu vien d’anunciar que va mercar a Duro Felguera’l taller de Barros, en Llangréu, pa arrendalu posteriormente a Indra y permitir que la multinacional instale ellí una fábrica de sistemes militares terrestres y vehículos blindaos. Adrián Barbón presentó la fórmula como una solución “satisfactoria pa toles partes”, albidramos que pa él les partes son Indra, Duro Felguera y dalgún bolsu intermediu que saldrá beneficiáu; el pueblu asturianu queda fuera de les partes satisfeches.

El preciu final nun foi oficialmente desveláu tovía, pero les cifres espublizaes asitien la operación cerca de los 15 millones d’euros. La cuestión ye especialmente sensible porque Indra venía manexando una valoración del activu próxima a los seis millones y les diferencies de preciu ente les dos empreses fueron precisamente ún de los principales obstáculos pa que la compraventa privada llegara a bon puertu.

Dicho d’otra manera: Duro Felguera ya Indra nun consiguieron ponese d’alcuerdu nel preciu y el Principáu decidió entrar na operación, mercar él mesmu les instalaciones pol duple del preciu y arrendá-yles depués a Indra pa que fabrique armamentu.

Porque’l proyeutu de Barros forma parte, amás, d’una expansión de la industria militar que yá tien otru centru importante n’Asturies. En 2025 Indra mercó directamente a Duro Felguera El Tallerón de Xixón, por 3,65 millones d’euros, incorporando los sos 156 trabayadores y destinando les instalaciones a la fabricación de vehículos militares. La estratexa ye consolidar n’Asturies un polu de producción militar alredor d’Indra.

Too ello sostiénse sobre un argumentu difícil de discutir nuna comarca castigada pola desindustrialización: hai que crear emplegu. L’alcalde de Llangréu, Roberto García, de Convocatoria por Llangréu-IU, recibió la compra “con mucha satisfacción”, anque reclamó emplegu estable, compromisos firmaos y un calendariu claru.

Pero precisamente porque l’emplegu ye imprescindible tendría de conocese con especial precisión qué compromisos adquier Duro Felguera, qué compromisos adquier Indra, cuánto paga finalmente’l Principáu, cuál ye’l alquiler que va cobrar, cuánto va tardar en recuperar la inversión y qué pasa si’l proyectu industrial nun cumple les previsiones.

A la contradicción económica súmase la política. El mesmu Gobiernu que primero defendía recuperar los seis millones convirtió progresivamente la industria militar nuna de les grandes apuestes industriales d’Asturies. Barbón yá se sumara públicamente a la fola favorable al aumentu del gastu militar y posteriormente la promoción institucional de la defensa como motor económicu provocó crítiques a la industria bélica como pretendida salida industrial p’Asturies. Al mesmu tiempu fala de paz, solidaridá y fin de les guerres.

La contradicción llegó estos díes a tener una representación  gráfica na presentación de la compra, na Escuela Internacional de Veranu d’UXT, onde un representante d’UXT nel Nalón defendía na televisión la llegada de la industria armamentística mientres detrás d’él podía vese una pancarta de “Stop xenocidiu en Gaza”.

Porque una cosa ye defender l’emplegu industrial y otra bien distinta convertir la fabricación d’armamentu nuna política industrial que, amás, precisa cada vegada más intervención económica pública.