La formación, empobinada a persones que quieran algamar un nivel elemental d’asturianu, va tener 100 hores llectives y va desendolcase pente’l 6 d’ochobre y el 15 d’avientu n’Uviéu
L’Academia de la Llingua Asturiana anunció una nueva edición del so cursu d’asturianu p’adultos Noyos, nesta ocasión empobinada a les persones que quieran algamar un nivel elemental A1-A2 de la llingua. La matrícula va abrir el próximu 14 de setiembre y va poder formalizase hasta’l día 30.
El cursu forma parte del programa Noyos de l’Academia de la Llingua Asturiana, un métodu d’alfabetización p’adultos que toma como referencia’l Marcu Común Européu de Referencia pa les Llingües y que trabaya l’aprendizaxe dende un enfoque fundamentalmente comunicativu, poniendo’l pesu na comprensión y na espresión oral y escrita. El programa ta plantegáu pa cubrir progresivamente los niveles A1, A2, B1, B2, C1 y C2.
Nesta convocatoria, la formación va sumar 100 hores llectives, de les que 60 van ser presenciales y otres 40 van corresponder a autoestudiu. Pa esti trabayu autónomu, l’alumnáu va disponer d’una plataforma dixital con materiales complementarios y conteníos audiovisuales.
Les clases presenciales van facese los martes y los xueves, de 17:00 a 20:00 hores, dende’l 6 d’ochobre hasta’l 15 d’avientu, nel llar de l’Academia de la Llingua Asturiana, na cai l’Águila, 10, d’Uviéu.
El preciu de la matrícula ye de 150 euros ya inclúi tanto los materiales necesarios pal siguimientu del cursu como la matrícula na prueba final.
La convocatoria amplía les posibilidaes de formación reglada pa les persones adultes interesaes n’aprender asturianu, complementando otres iniciatives que vienen desarrollándose nos últimos años, como los cursos d’asturianu d’Iniciativa pol Asturianu, que na so convocatoria de primavera ufiertaron formación inicial a distancia con acreditación de nivel A1 de l’Academia.
Les persones interesaes pueden consultar les condiciones completes, los materiales y l’accesu a la matrícula na páxina oficial del programa Noyos.
This work is licensed under a Creative Commons Attribution 4.0 International License.
