El Gobiernu asturianu anunció que va votar escontra la propuesta del Ministeriu de Facienda nel Conseyu de Política Fiscal y Financiera (CPFF), al considerar que’l modelu nun incorpora de manera abonda factores decisivos p’Asturies, como l’avieyamientu, la orografía y el costu efectivu de prestar servicios públicos.

El conseyeru de Facienda, Xusticia y Asuntos Europeos, Guillermo Peláez, esplicó que la posición del Principáu ye coherente col alcuerdu aprobáu pola Xunta Xeneral en 2020 y cola Declaración de Santiago de 2021. El plantegamientu asturianu reclama que la financiación nun se llimite a repartir recursos por población, sinón que tea en cuenta cuánto cuesta garantizar sanidá, educación y servicios sociales nun territoriu dispersu y avieyáu.

Un votu contrariu que nun bloquea la propuesta

La reunión del CPFF va celebrase en Madrid. La mayoría de votos que tien el Ministeriu fai que la oposición d’Asturies nun impida por sigo mesma que la propuesta salga alantre. Sicasí, el votu contrariu fija una posición política sobre un debate que determina la capacidá del país pa sostener los servicios públicos.

El discutiniu tien una dimensión territorial evidente: aplicar criterios uniformes a realidaes demográfiques y xeográfiques bien distintes pue traducise nuna financiación insuficiente. El debate enlaza cola necesidá d’una capacidá política propia p’Asturies y cola defensa d’un repartu de recursos que nun penalice a los territorios con mayores costes estructurales.

El Principáu tendrá agora que concretar qué cambios reclama nel modelu y qué efeutos tendría la propuesta estatal sobre les cuentes asturianes. La posición crítica namás va ser útil si vien acompañada de datos públicos, comparables y entendibles sobre’l coste real de los servicios.

This work is licensed under a Creative Commons Attribution 4.0 International License.