El Conceyu de Ḷḷena quedó ensin entrar nel repartu de dos importantes llinies autonómiques d’ayudes al emplegu correspondientes a 2026 y 2027 mientres que Nava perdió una d’elles. Les resoluciones publicaes nel BOPA recueyen la inadmisión de les sos solicitúes por presentación fuera del plazu afitáu. Ente dambes convocatories, el Serviciu Públicu d’Empléu del Principáu distribúi más de 19 millones d’euros. 

El Conceyu de Ḷḷena figura fuera de dos convocatories del Serviciu Públicu d’Emplegu del Principáu d’Asturies destinaes a financiar contratación municipal, según les resoluciones publicaes esti 31 d’agostu nel Boletín Oficial del Principáu d’Asturies (BOPA). Pel so lláu, Nava accede a una d’elles pero pierde la más cuantiosa.

Trátase, per un llau, de les subvenciones pa los Planes d’Emplegu nel marcu de los itinerarios integraos d’activación nel ámbitu local y, per otru, de les ayudes pa contratos formativos pa la obtención de práctica profesional acorde col nivel d’estudios.

La convocatoria de Planes d’Emplegu cuenta con un presupuestu de 14.433.000 euros, repartíu ente les anualidaes de 2026 y 2027.

El plazu de presentación acababa’l 2 de xunetu. Según la propia resolución del SEPEPA, 76 de los 78 conceyos asturianos presentaron solicitú y dos d’elles llegaron fuera de plazu. Les 74 restantes fueron almitíes y cumplíen los requisitos pa resultar beneficiaries, polo que foi necesario aplicar los criterios de repartu al superar les cantidaes solicitaes el créditu disponible.

La finalidá d’estes ayudes ye financiar contratación temporal de persones desemplegaes, especialmente desemplegaos de llarga duración y persones en situación o riesgu d’esclusión social.

La segunda convocatoria afectada financia contratos formativos pa facilitar experiencia profesional a menores de 30 años, inscritos nel Sistema Nacional de Garantía Xuvenil y con una titulación relacionada col puestu de trabayu. Nava nun quedó fuera d’esta segunda ayuda, na convocatoria de contratos formativos presentó correctamente y recibió 26.000 euros.

Esta llinia cuenta con otros 5 millones d’euros, 2,5 millones en 2026 y otros tantos en 2027. La resolución espublizada nel BOPA inclúi un anexu específicu coles solicitúes non almitíes y afita nuevamente la presentación fuera del plazu llegal por parte de Ḷḷena como causa d’inadmisión.

Tres conocese les resoluciones, el Conceyu de Ḷḷena aseguró que la situación respondería a un «error alministrativu» y recalquen: «Nun renunciamos al Plan d’Emplegu».

This work is licensed under a Creative Commons Attribution 4.0 International License.