La nueva cartografía identifica 76 árees de riesgu significativu y concentra la mayor esposición nes zones urbanes ya industriales del centru, nes cuenques del Nalón y el Caudal y en dellos tramos costeros

La revisión de los Mapes de Peligrosidá y Riesgu d’Inundación de la Confederación Hidrográfica del Cantábricu dibuxa un territoriu asturianu especialmente vulnerable alredor de los grandes ríos, les zones costeres y los espacios urbanos construyíos nes vegues fluviales. Nel escenariu más ampliu estudiáu, 122.850 persones podríen resultar afectaes n’Asturies.

La cartografía identifica 76 Árees de Riesgu Potencial Significativu d’Inundación, les denominaes ARPSI. Son espacios nos que la combinación ente la posibilidá d’una crecida y les sos posibles consecuencies sobre la población, les viviendes, les infraestructures, la economía o’l mediu ambiente fai necesario un seguimientu y una planificación específicos.

Los nuevos mapes formen parte del tercer ciclu d’aplicación de la normativa europea sobre inundaciones y actualicen la información disponible sobre la Demarcación Hidrográfica del Cantábricu Occidental. El trabayu revisa tanto la estensión que podría algamar l’agua como los daños potenciales en cada zona, incorporando tamién les inundaciones causaes poles agües costeres y de transición.

La Confederación trabaya con tres niveles de probabilidá. Les zones d’alta probabilidá correspuenden a inundaciones con un períodu de retornu de diez años; les de probabilidá media, a episodios de cien años; y les de baxa probabilidá, a sucesos estraordinarios de quinientos años. Esto equival, respectivamente, a probabilidaes añales aproximaes del 10%, el 1% y el 0,2%.

N’Asturies, los cálculos estimen que 50.973 persones viven dientro de les zones correspondientes al escenariu d’alta probabilidá. La cifra aumenta hasta 83.699 habitantes nel escenariu de probabilidá media y llega a 122.850 cuando se considera la inundación de baxa probabilidá y mayor estensión.

Nun se trata d’un censu individualizáu de cada vivienda. La estimación tomó como referencia los datos del INE de 2024 y calculó la población potencialmente afectada según la proporción de superficie urbanizada que queda dientro de la zona inundable de cada seición censal. Esta nueva metodoloxía busca afinar los cálculos utilizaos nos ciclos anteriores.

La evaluación incorpora amás indicadores sociales útiles pa determinar la vulnerabilidá de cada zona, como la densidá de población, la tasa de dependencia de les persones mayores de 64 años, la presencia de población estranxero, el nivel educativu o la distribución ente homes y muyeres.

Les árees urbanes ya industriales de Xixón, Uviéu, Avilés, Mieres y Llangréu concentren una parte importante del riesgu. Nestos espacios, la elevada densidá de población y la presencia de viviendes, polígonos industriales, carreteres, servicios públicos y otres infraestructures aumenten les posibles consecuencies d’una crecida.

Les cuenques del Nalón y el Caudal presenten igualmente una esposición relevante. A elles súmense numerosos espacios venceyaos al Narcea, el Sella, el Navia, l’Esva, el Trubia o’l Raíces. Nes zones rurales la densidá de población suel ser menor, pero les inundaciones pueden afectar carreteres, pontes, viviendes aisllaes, terrenos agrícolas, servicios básicos y accesos a pequeños núcleos.

La revisión conserva la delimitación de les árees de riesgu existentes y actualiza la información sobre la población, los usos del suelu y los bienes potencialmente afectaos. La principal revisión de la cartografía de peligrosidá n’Asturies céntrase nel ríu Raíces, nel espaciu comprendíu ente Avilés y Castrillón. Nel restu de les ARPSI actualizáronse fundamentalmente los mapes de riesgu.

Los estudios nun analicen únicamente’l númberu d’habitantes. Tamién cartografíen l’ actividá económica, les zones industriales, les edificaciones, les víes de comunicación, los centros sanitarios y educativos, les estaciones depuradores, los servicios básicos, el patrimoniu cultural y les árees de relevancia ambiental que podríen quedar afectaes.

Tormentes más intenses y subida del nivel del mar

Les proyeiciones climátiques nun anticipen grandes variaciones na cantidá total de lluvia añal nel Cantábricu Occidental. Sicasí, señalen como probable un aumentu de la frecuencia y la intensidá de los episodios tormentosos, lo que podría provocar crecíes más fuertes y un incrementu de los caudales máximos de los ríos a llargu plazu.

A esta amenaza súmase la subida del nivel mediu del mar, yá constatada de manera instrumental na costa cantábrica. El calentamientu del agua y el desxelu contribúin a esi ascensu, que puede aumentar la inundabilidá de les ríes, los estuarios, los tramos baxos de los ríos y otres zones costeres.

La Confederación considera probable que’l cambéu climáticu tenga un efectu significativu sobre les inundaciones a mediu y llargu plazu, especialmente polos cambios nos caudales de crecida y nel nivel del mar. Sicasí, estos efectos entá nun s’incorporaron directamente a la delimitación de los mapes actuales, pola incertidume de les proyeiciones y pola dificultá de midir cambios tan graduales dientro d’un ciclu de planificación de seis años.

Los mapes permiten conocer qué espacios podríen quedar cubiertos pola agua, la fondura que podría algamar la inundación y los bienes espuestos en cada escenariu. Esta información tien que sirvir pa orientar la ordenación urbanística, limitar nuevos usos nes zones más peligroses, preparar planes d’emerxencia y priorizar les actuaciones de defensa o adaptación.

La prevención, el caltenimientu de los cauces, la planificación territorial y la preparación de los servicios públicos conviértense nuna cuestión central pa la seguridá futura d’Asturies.

This work is licensed under a Creative Commons Attribution 4.0 International License.