La organización agraria USAGA alerta d’una xubida del 26,79% nos robos, de la escasa resolución de los casos y d’una burocracia que desanima a munches persones afeutaes a presentar denuncia.
La Unión de Sectoriales Agrarios y Ganaderos d’Asturies (USAGA) denunció l’aumentu de los robos nel mediu rural asturianu y reclamó más medios personales y materiales pa garantizar la seguridá nes zones agraries y ganaderes. Según los datos analizaos pola organización en collaboración con Unión de Uniones, Asturies foi l’únicu territoriu del Estáu onde esti tipu de delitos creció a lo llargo de 2025.
Les cifres recueyen una xubida del 26,79% nel númberu de robos denunciaos en comparanza con 2024. Esti incrementu contrasta cola reducción rexistrada n’España y xenera, según USAGA, una sensación creciente d’indefensión ente los profesionales del sector primariu.
A la xubida de los robos súmase una reducción importante de la capacidá pa esclariar los casos. Según los datos manejaos por USAGA, en 2025 denunciáronse formalmente 71 robos nel mediu rural asturianu, de los que namás nueve llegaron a resolvese. La tasa d’esclarecimientu cayere alredor d’un 47% al respective del añu anterior.
Esta baxa resolución esmolez especialmente nun territoriu marcáu pola dispersión de la población, la existencia de munches esplotaciones aisllaes y les dificultaes pa xixilar superficies amplíes. Los robos de maquinaria, ferramientes, combustible, material ganaderu o productos agrarios pueden suponer una perda económica importante pa esplotaciones que, en munchos casos, yá trabayen con márxenes mui axustaos.
Pa la organización agraria, la falta recursos pa prevenir y resolver robos contrasta cola presión alministrativa y inspectora que carecen les esplotaciones. USAGA critica que se destinen más esfuerzos a controlar la actividá cotidiana d’agricultores y ganaderos que a prevenir los delitos de los que son víctimes.
USAGA alvierte, amás, de que les estadístiques oficiales nun espeyen necesariamente la dimensión real del problema. Una parte de los robos nun llega a denunciase, especialmente cuando’l valor de los oxetos sustraíos ye reducíu o les posibilidaes de recuperalos son escases.
La organización atribúi esta infradenuncia al procesu burocráticu que tienen que siguir les persones afeutaes. El tiempu necesariu pa desplazase, presentar la denuncia y realizar los trámites correspondientes, pa depués nun tener solución, lleva a munchos profesionales a considerar que nun compensa iniciar el procedimientu.
Esti fechu provoca que les cifres oficiales puedan quedar perbaxo de la realidá y dificulta una evaluación precisa de la inseguridá nel campu. Tamién fai más complicada la identificación de les zones con mayor incidencia y la planificación de dispositivos específicos de prevención.
This work is licensed under a Creative Commons Attribution 4.0 International License.
