El XXIX Festival Intercélticu d’Avilés y Comarca entamó güei una edición que va prolongase hasta’l 26 de xunetu con música, danza, artesanía, gastronomía y actividaes culturales. La programación reúne participantes d’Asturies, Escocia, Irlanda, Bretaña, Galicia y Gales, y esti añu estiéndese tamién a Cangues d’Onís, Pravia y Corvera.

Avilés conviértese dende güei nun puntu d’alcuentru pa les cultures celtes cola celebración de la edición númberu 29 del Festival Intercélticu d’Avilés y Comarca. La programación va desenvolvese hasta’l domingu 26 de xunetu, cola pista de La Esposición, nes Meanes, como espaciu principal, anque les actividaes van ocupar tamién otros puntos de la ciudá y de la comarca.

El festival, entamáu pola Asociación Cultural Esbardu, lleva celebrándose dende 1997 y ta reconocíu como Fiesta d’Interés Turísticu Rexonal dende 2008. A lo llargo de casi trés décades foi incorporando, amás de bandes de gaites, grupos de música folk y formaciones de baille tradicional, propuestes rellacionaes cola artesanía, la gastronomía, la historia, la fotografía, el teatru y otres manifestaciones culturales.

La xornada inaugural d’esti llunes 20 de xunetu entamó a les 18:00 hores nel Centru Social Les Meanes cola Amuesa d’Arte Celta, onde pueden vese los ‘Autómates del Arcu Atlánticu’, de Daniel González, y la propuesta de cerámica ‘Maelic’, de Luis Gago Argüello. Media hora dempués abrió l’Aldea Celta, con mercáu artesanal, restauración, productos d’alimentación y atracciones infantiles.

La programación de güei incluyó tamién una exhibición de la Escuela Gaudiosa d’Esgrima Histórica, la primera actividá d’estes característiques que forma parte del Intercélticu; los V Alcuentros de Danza y Rítmica, cola participación del Club de Gimnasia Rítmica Valoe y l’Academia de Danza Step, y una Nuechina en Danza protagonizada pol Grupu de Baille Tradicional Esbardu.

Otra de les actividaes de l’apertura foi la Cata Intercéltica celebrada nel Chigre L’Argayu, na plaza del Carbayedo. La propuesta reunió productos de les queseríes Rey Silo, La Peral y Gorfolí, xunto colos de Picofino Vermut & Gin. La convocatoria completó l’aforu y zarró anticipadamente les inscripciones.

La edición de 2026 cuenta con una presencia amplia de formaciones asturianes y internacionales. Ente les participantes figuren la Banda de Gaites y el Grupu de Baille Tradicional Esbardu, Prau Llerón, la Bandina Turcipié, Los Muíles, The Crass y Cuévanu. Dende Escocia llega la Barrhead & District Pipe Band; Irlanda ta representada pola Jordan Academy Irish Dance; Bretaña, por Bugale An Oriant y Sonerien An Oriant; Galicia, pola Banda de Gaites de Xinzo de Limia, y Gales, pol músicu Gareth Bonello, conocíu artísticamente como The Gentle Good.

A lo llargo de la selmana van cellebrase pasucáis pel centru d’Avilés, amueses dedicaes a cada territoriu participante, conciertos, talleres de baille y nueches d’intercambiu musical. La programación inclúi igualmente la charra ‘Los ástures transmontanos’, que va impartir Fernán Morán nel Palaciu de Valdecarzana, el taller infantil ‘Voi facer un castru’ y un cursu de técnica de caxa dirixíu por Xoan Losada, profesor de música na Banda de Gaites de Xinzo de Limia.

El Festival Intercélticu va salir esti añu de la so sede principal con actividaes en Cangues d’Onís, onde va haber una amuesa de folclor escocés ya irlandés; en Pravia, con participación bretona, y en Corvera, que va recibir formaciones d’Irlanda, Escocia, Bretaña, Galicia y Asturies.

El pieslle va llegar el domingu 26 cola Marcha Celta, un gran desfile que va percorrer el centru d’Avilés dende les 18:30 hores. La ceremonia final va reunir les banderes, los himnos y les representaciones de los distintos territorios participantes na pista de La Esposición, onde’l festival va despidir la edición de 2026 cola vista puesta nel so trentenu aniversariu.

This work is licensed under a Creative Commons Attribution 4.0 International License.