La llocución del espectáculu celebráu’l vienres 17 de xunetu desenvolvióse dafechu en castellanu y tampoco respetó la forma oficial Xixón, presente n’ediciones anteriores.

L’espectáculu de drones celebráu na playa de Poniente de Xixón el vienres 17 de xunetu dexó, amás de les figures lluminoses nel cielu, un nuevu exemplu del retrocesu que vive la normalización del asturianu nel conceyu dende la llegada de Carmen Moriyón a l’Alcaldía. La fecha del eventu figuraba dientro de la programación municipal del branu de 2026.

Según la denuncia difundida tres l’espectáculu, la llocución qu’acompañó les evoluciones de los drones nun incluyó nenguna presencia del asturianu. A ello súmase l’incumplimientu de la toponimia oficial, al emplegase únicamente ‘Gijón’ en cuenta de la denominación oficial. Les imáxenes comparatives espublizaes nes redes sociales amuesen que la forma oficial completa sí apareciera n’espectáculos d’años anteriores.

Nun se trata namás d’una cuestión simbólica. Un acontecimientu promovíu pol Conceyu, siguíu por miles de persones y pensáu como escaparate turísticu y cultural de la ciudá ye precisamente ún de los espacios nos que tendría que garantizase una presencia normal y visible de la llingua propia. La desapaición del asturianu de la narración y de les imáxenes proyectaes supón, poro, un pasu atrás frente a les práctiques siguíes n’ediciones anteriores.

La situación recuerda los compromisos incluyíos nel pactu alcanzáu en 2023 ente Foro y Vox pa facilitar la investidura de Carmen Moriyón. Aquel documentu establecía la ‘conxelación de les polítiques de promoción llingüística’, impedía aumentar les partíes presupuestaries destinaes a elles y determinaba que la promoción de la ciudá nel territoriu estatal se realizara en castellanu.

Ye cierto que Moriyón anunció n’ochobre de 2023 la rotura del alcuerdu de gobiernu con Vox y la salida del partíu d’ultraderecha del executivu municipal. Sicasí, decisiones como la tomada nel espectáculu de drones refuercen la impresión de que la llinia política acordada en materia llingüística sigue aplicándose de facto.

Convien recordar que los drones que güei s’aplauden como espectáculu lluminosu formen parte d’una tecnoloxía que tamién s’utiliza con fines militares. Mientres en Xixón dibuxen figures nel cielu, n’otros llugares del mundu aparatos basaos nesa mesma tecnoloxía sirven pa vixilar, atacar y soltar bombes sobre poblaciones. Una realidá que nun tendría que pasar inadvertida tres la fascinación pol espectáculu.

This work is licensed under a Creative Commons Attribution 4.0 International License.