La Plaza Cubierta de La Pola Siero convirtióse esti miércoles nel puntu d’alcuentru del sector sidreru asturianu cola celebración de la XV edición del Salón DOP Sidre d’Asturies, la cita na que la Denominación d’Orixe Protexida presentó oficialmente les sidres de la campaña 2026.
La gran vencedora del salón foi Contrueces, de Xixón, que llogró’l máximu reconocimientu na categoría de Sidre Natural Tradicional. El podiu completáronlu Quelo, de Tiñana, y Val de Boides, ellaborada por Sidra Castañón en Quintueles. Nes demás categoríes repitieron triunfu Españar como meyor sidra filtrada y EM como meyor sidre d’espolleta, dambes de Sidra El Gobernador, en Villaviciosa. El premiu al meyor cosecheru recayó en Juan Antonio Junco.
El certame aconceyó a 28 llagares y a cerca de 2.000 asistentes, ente collecheros, llagareros, distribuidores, hosteleros y profesionales venceyaos al mundu de la sidre. Mientres la xornada, los visitantes tuvieron ocasión de tastiar les ellaboraciones amparaes pola DOP y conocer de primera man les impresiones de los propios llagareros sobre una campaña marcada pola bona calidá de la materia primo.
Amás de les tasties de sidre, el salón volvió destacar pola presencia de productos agroalimentarios asturianos de calidá, que permitieron amosar les posibilidaes d’harmonización de la sidre con otros alimentos del país. Quesos, fabes, miel y carne de xata formaron parte de la ufierta gastronómica d’una xornada concebida como escaparate del conxuntu del sector agroalimentariu asturianu.
Nel trescursu l’eventu nomóse embaxadora de la DOP Sidre d’Asturies a la polesa Montse Tomé. Pela so parte, el presidente del Conseyu Regulador, Jorge García Álvarez, destacó la elevada calidá de les nueves sidres y amosó la so confianza nel futuru d’una denominación que sigue medrando añu tres añu. Tamién anunció la so intención de conseguir la Denominación pa la sidre de Xelu.
Con una elevada participación y una amplia representación de los distintos sectores venceyaos a la cultura sidrera, el Salón DOP Sidra d’Asturies volvió confirmar el bon momentu que traviesa la sidre con denominación d’orixe y el creciente interés que despierta ente consumidores y profesionales.
This work is licensed under a Creative Commons Attribution 4.0 International License.
