La plataforma Asturies pola Paz convoca una concentración esti xueves 11 de xunu, a les 19 hores, delantre del Teatru Campoamor d’Uviéu, baxo’l llema «Non a les guerres, non al imperialismu, non al fascismu». La movilización pretende denunciar la escalada bélica que se vive actualmente en distintes partes del mundu y reclamar una apuesta decidida pola diplomacia, el diálogu y la paz.
Dende la organización recuerden qu’anguañu hai más de sesenta conflictos armaos activos n’estremaes fasteres del planeta, ente ellos los que se desarrollen en Sudán, el Sahel, Ucraína, Irán, el Líbanu o Palestina. La plataforma amuesa la so esmolición pola estensión d’estos conflictos y pol riesgu de qu’algunes d’estes crisis puedan derivar n’escenarios entá más graves, inclusive cola amenaza del usu d’armes nucleares.
Asturies pola Paz critica tamién l’aumentu continuu del gastu militar nos países occidentales. Según señala, los 32 estaos miembros de la OTAN destinaron de forma conxunta más de 1,5 billones d’euros a defensa, ente que Europa triplica’l gastu militar de Rusia. Nel casu del Estáu español, la plataforma destaca que’l presupuestu militar de 2025 algamó los 40.000 millones d’euros, una cifra que podría superar los 60.000 millones si se tienen en cuenta les partíes distribuyíes n’otros ministerios.
Los convocantes cuestionen igualmente los planes de rearmamentu impulsaos dende les instituciones europees y estatales. Nesti sen, alvierten de que los 800.000 millones d’euros anunciaos pola Comisión Europea y los 94.000 millones comprometíos pol Gobiernu español hasta 2035 nun suponen, al so xuiciu, una garantía de mayor seguridá nin una ferramienta eficaz pa evitar nuevos conflictos.
La plataforma considera que les polítiques basaes n’acumulación d’armamentu y na llóxica de los bloques militares contribúin a aumentar la tensión internacional. Frente a ello, revindica que les prioridaes del gastu públicu tienen de centrase na meyora de les condiciones de vida de la población, la defensa de los servicios públicos y la preservación de la vida nel planeta.
Con esta concentración, Asturies pola Paz fai un llamamientu a la ciudadanía asturiana pa sumase a una movilización que quier ser una voz colectiva en favor de la paz y contra les guerres, l’imperialismu y l’ascensu de les corrientes fascistes que, según denuncien, tán ganando presencia en distintos países del mundu.
This work is licensed under a Creative Commons Attribution 4.0 International License.
