Xuan Valladares convirtió la so intervención de nuna dura crítica al socialismu institucional. Faló d’una “corrupción xeneralizada y endémica”, definió al PSOE como una “empresa de colocación” destinada a caltener una “xigantesca rede clientelar” y afirmó que munchos de los escándalos que marcaron la vida política asturiana y estatal acabaron ensin responsables políticos asumiendo consecuencies.

La dimisión del yá exconceyal de Vecinos por Llanes Xuan Valladares por acceder de forma irregular a documentación municipal baxo custodia dexó una de les intervenciones más contundentes que se recuerden nel plenu llaniscu. Lloñe de llendase a pidir perdón pol error cometíu, Valladares aprovechó la so despidida pa cargar duramente contra’l PSOE, al que responsabilizó de  los males que vien arrastrando la política asturiana dende va décades.

Les sos declaraciones llamaron especialmente l’atención porque fueron realizaes por un cargu públicu que conoz dende dientro la situación y que se vió personalmente implicáu nes trames de corrupción que denuncia; al empar, asumía públicamente les consecuencies de los sos actos. “Equivoquéme y pido perdón”, vino dicir Valladares, qu’anunció la so renuncia al acta de conceyal. Pero, una vegada asumida la so responsabilidá, pasó a formular una pregunta incómoda: ¿cuántos responsables políticos fixeron lo mesmo en casos muncho más graves?

L’ exedil convirtió la so intervención nuna dura crítica al socialismu institucional. Faló d’una “corrupción xeneralizada y endémica”, definió al PSOE como una “empresa de colocación” destinada a caltener una “xigantesca rede clientelar” y afirmó que munchos de los escándalos que marcaron la vida política asturiana y estatal acabaron ensin responsables políticos asumiendo consecuencies.

Na so intervención recordó casos como los sobrecostes d’El Musel, los Fondos Mineros, el casu Marea, ASEAVA o COGERSA, amás d’otros asuntos d’ámbitu estatal que salpicaron al PSOE nos últimos años. La idea que repitió una y otra vez foi la mesma: “nenguna dimisión”.

Más allá de la contundencia de les espresiones utilizaes, les pallabres de Valladares llamen l’atención porque vienen a verbalizar una percepción bien estendida n’amplios sectores de la sociedá asturiana. La idea de qu’esiste una estrecha vinculación ente poder políticu, PSOE, alministración, redes clientelares y falta de responsabilidaes, una realidá vien formando parte del debate públicu dende hai años.

Nel so manifiestu de dimisión, Valladares nun se llendó a asumir la so responsabilidá. Tamién denunció lo que calificó como un sistema burocráticu ineficiente y un modelu políticu que premia la obediencia y la pertenencia a les cadarmes de poder perriba de la responsabilidá individual. Nun ye una percepción nueva. Dende los tiempos de José Ángel Fernández Villa y Tini Areces hasta los distintos escándalos que fueron surdiendo al rodiu de les alministraciones públiques asturianes, son munchos los ciudadanos que consideren que la responsabilidá política nunca acompañó a los errores, irregularidaes o presuntos casos de corrupción conocíos.

Asina, la despedida política del exconceyal llaniscu, recordemos, pola so implicación nun actu illegal, acabó convirtiéndose nun alegatu contra una manera d’entender la política que lleva décades instalada nes instituciones.  “Salgo del fangu y vuelvo a la lluz de la política decente”, concluyó Valladares antes d’abandonar el salón de plenos. Una frase que resume’l tonu d’una intervención que, ensin dulda, va siguir dando que falar más allá de la so dimisión.

This work is licensed under a Creative Commons Attribution 4.0 International License.