El xuiciu contra un militante d’Asturies Insumisa acusáu d’un presuntu delitu de daños por unes pintaes realizaes durante la manifestación de solidaridá con Palestina celebrada en Xixón el 5 d’ochobre de 2025 quedó vistu pa sentencia tres la vista celebrada esta selmana. La principal novedá del procesu foi que la propia Fiscalía solicitó l’absolución del acusáu.

Concentración de sofitu al acusáu ya en defensa del Pueblu Palestín

El casu tien el so orixe nuna multitudinaria movilización celebrada na ciudá xixonesa los díes 4 y 5 d’ochobre de 2025, na que miles de persones salieron a la cai pa reclamar el fin de la guerra en Gaza y amosar la so solidaridá col Pueblu Palestín. 

Meses dempués de la protesta, un militante d’Asturies Insumisa recibió una citación a xuiciu oral acusáu de realizar pintaes durante la manifestación. Dende entós, la organización vien denunciando lo que considera un procesu de criminalización de la solidaridá con Palestina y convocó movilizaciones de sofitu coincidiendo cola celebración del xuiciu.

Tres la vista oral, y anque’l procedimientu quedó pendiente de sentencia, la petición d’absolución formulada pola Fiscalía foi recibida con satisfacción polos colectivos de sofitu al acusáu. Dende Asturies Insumisa consideran que la decisión reforcia la so posición y reclamaron que la resolución xudicial confirme definitivamente la non culpabilidá del so compañeru.

La organización aseguró que va siguir participando nes movilizaciones de solidaridá col pueblu palestín y defendiendo les sos reivindicaciones polítiques. Nesi sentíu, volvió denunciar lo que considera un xenocidiu contra la población palestina y reclamó la depuración de responsabilidaes y la devolución de los territorios ocupaos.

El fallu xudicial va determinar agora si’l xulgáu confirma la tesis defendida pola Fiscalía y decreta l’absolución del militante, poniendo fin a un procesu que foi siguíu con especial atención polos movimientos sociales y colectivos solidarios con Palestina n’Asturies.

This work is licensed under a Creative Commons Attribution 4.0 International License.