Nun puede siguir priorizándose’l turismu perriba de los habitantes d’Asturies, ya eso inclui la fauna, especialmente nos espacios naturales protexíos; sicasí l’aumentu constante d’infraestructures vinculaes al turismu d’aventura ta convirtiendo munches zones d’altu valor ecolóxicu en espacios sometíos a una presión humana incompatible cola conservación del mediu natural.

Via Ferrata

La Coordinadora Ecoloxista d’Asturies presentó alegaciones al proyectu d’ordenanza de la vía ferrata que tramita’l Ayuntamiento de Teberga y reclamó que se prohiba l’accesu turísticu durante la dómina de reproducción de les especies protexíes presentes na zona.

La instalación ta allugada nel entornu de los cantiles de la Peña Sobia, dientro del Parque Natural de Las Ubiñas-La Mesa, espaciu incluyíu na Rede Natura 2000 y consideráu d’altu valor ambiental.

Dende la Coordinadora recuerden que les víes ferrates son infraestructures diseñaes pa que puedan ser utilizaes por persones ensin esperiencia previa n’escalada, lo que provoca una elevada afluencia d’usuarios. Según denuncien, la presencia continua de visitantes nun espaciu natural tan sensible puede xenerar “importantes molesties” a la fauna montesa, alterando los sos ciclos vitales ya inclusive favoreciendo’l desplazamientu de les especies.

El colectivu ecologista señala que ta constatada la presencia de ñeros d’águila real cerca del trazáu de la vía ferrata. A menos de 400 metros esiste una zona angosta de canales onde esta especie crió nos últimos años. L’águila real (Aquila chrysaetos) figura nel Llistáu d’Especies Silvestres en Réxime de Protección Especial y apaez catalogada como “Casi Amenazada” nel Llibru Coloráu de les Aves d’España y como “Vulnerable” nel Catálogu Rexonal d’Especies Amenazaes.

Tamién alvierten de la presencia d’alimoche común (Neophron percnopterus) na Sierra de Gradura, próxima a la instalación. Esta especie ta considerada “Vulnerable” tanto nel Llistáu estatal como nel Llibru Coloráu de les Aves d’España y figura como “D’Interés Especial” nel CREA.

Otra de les especies citaes nes alegaciones ye l’osu pardu (Ursus arctos), cuya presencia, según la Coordinadora, “ye constante” na zona, que tamién funciona como área de reproducción. L’osu pardu ta catalogáu como especie “En peligru d’estinción” tanto nel marcu estatal como nel autonómicu.

La organización ecologista recuerda que la Ley 42/2007 del Patrimonio Natural y de la Biodiversidad prohibe “matar, estropiar, molestar o inquietar intencionadamente a los animales silvestres”, independientemente de la fase del so ciclu biolóxicu.

Amás, señalen que’l Código Penal español recueye nel artículu 334 que pueden ser castigaes con pena de prisión o multa les actividaes que “impidan o dificulten” la reproducción o migración de les especies de fauna silvestre.

El colectivu considera que les alministraciones tienen la obligación de poner llendes al modelu de masificación turística cuando entra en conflictu cola protección de la biodiversidá y cola supervivencia d’especies amenazaes. “La fauna tamién ye habitante d’Asturies”, recuerden, y reclamen que la preservación de los ecosistemes tenga prioridá frente a intereses recreativos o económicos.

La Coordinadora Ecoloxista d’Asturies confía en que’l Conceyu atienda les alegaciones presentaes y reclame la retirada de la instalación o, cuando menos, la prohibición del so usu durante’l periodu de reproducción de les especies protexíes, momentu nel que consideren que la fauna ye especialmente vulnerable.

This work is licensed under a Creative Commons Attribution 4.0 International License.