El sindicatu SUATEA denunció que la construcción de namái dos aules nes nueves escuelines de 0 a 3 años proyectaes nos colexos públicos CP Rey Pelayo y CP Santa Olaya ye “insuficiente” y reclama esplicaciones a les Direcciones Xenerales de Rede 0 a 3 ya Infracadarmes sobre’l diseñu y los retrasos d’estos equipamientos educativos.

La Conseyería d’Educación anunció la creación de dos nueves escuelines dientro de la segunda fase de la rede autonómica de Les Escuelines, pero, según la información facilitada pola propia Alministración, dambes instalaciones cuntarán únicamente con dos unidaes.

Dende SUATEA consideren necesario qu’Educación esponga públicamente los criterios pedagóxicos, organizativos y de planificación educativa que xustifiquen esta decisión. El sindicatu recuerda que’l modelu habitual y “más coherente” pal primer ciclu d’Educación Infantil contempla tres unidaes diferenciaes, correspondientes a los tramos de 0 a 1, 1 a 2 y 2 a 3 años.

Nesti sen recuerden qu’inicialmente la propia Alministración previera que la escuelina proyectada nel CP Los Campos tuviera tres unidaes. Tamién señalen que les demás actuaciones recientes o entá en desendolcu en Xixón tienen una dimensión distinta.

Asina, la escuelina Los Nuberinos, allugada nel CP Asturias, abrió con tres aules, ente que la prevista nel CP Montevil contará con cuatro unidaes.

Pa SUATEA, resulta “razonable” entrugar por qué les nueves escuelines de Rey Pelayo y Santa Olaya se proyecten con una cadarma amenorgada de dos unidaes y qué consecuencies va tener esta decisión na organización educativa y na ufierta pública de places.

El sindicatu tamién amosó el so esmolecimientu polos continuos retrasos que vienen afeutando al desendolcu de la rede autonómica 0-3. Nesti contestu, recordó que la escuelina Los Nuberinos acumuló una demora de más d’un cursu académicu respecto a les feches anunciaes inicialmente pola Conseyería.

Nel casu de les actuaciones de Rey Pelayo y Santa Olaya, SUATEA señala que, anque los proyectos yá taríen redactaos, les obres entá nun salieron a llicitación. Nel casu concretu del Rey Pelayo, les obres “decayeron a finales de 2025 ensin esplicaciones clares”.

Dende’l sindicatu afirmen que la consolidación d’una rede pública 0-3 “de calidá” necesita una ufierta suficiente y equilibrada, centros afayaízos nel so dimensionamientu, estabilidá y coherencia na planificación, condiciones llaborales dignes pa les trabayadores, información tresparente y un modelu pedagóxicu coherente pa tola etapa educativa.

Finalmente, SUATEA considera que la espansión del primer ciclu d’Educación Infantil “tien d’abordase dende criterios de planificación educativa rigorosa”, cosa que nun ta faciéndose.