Vecines de cuatro conceyos vuelven xubir a Peñamayor pa defender el territoriu frente al proyectu mineru Astur A

Un de los tre grupos qu’ascendieron a la cume

Les vecines de Bimenes, Llaviana, Nava y Piloña tornaron enllenar esti 24 de mayu los caleyos de Peñamayor nuna nueva xornada revindicativa en defensa d’esti espaciu natural frente al permisu d’investigación minera Astur A. La convocatoria sirvió pa reclamar la caducidá del proyectu y visibilizar el refugu social a la posibilidá d’una esplotación minera a cielu abiertu na zona.

La xornada entamó con distintes salides escontra los cumes dende dellos puntos del territoriu: dende La Bahúga, en Llaviana, a les 10:00 hores; Fayacava, en Bimenes, a les 11:00; y Les Praeres, en Nava, tamién a les 11:00. Les distintes marches confluyeron na cume de Peñamayor al rodiu de les 13:00 hores, onde se lleó un comunicáu. Dende la organización denunciaron los riesgos ambientales y sociales venceyaos a la minería a cielu abiertu, qu’aseguren que “malpenes xenera emplegu llocal” y, sicasí, provoca “daños irreparables na naturaleza”, estrozando’l paisaxe, contaminando les agües y comprometiendo’l futuru del territoriu.

Tres la baxada, les persones participantes compartieron una xinta popular en Fayacava a les 15:00 hores. La xornada completóse cola presentación del manifiestu de defensa del territoriu y actuaciones musicales de magar les 16:30.

La movilización volvió poner nel centru’l debate sobre’l modelu de desendolcu del mediu rural y la protección d’espacios naturales y comuñales como Peñamayor, un territoriu que les asociaciones y colectivos convocantes consideren incompatible con proyectos d’investigación minera d’esti tipu.

This work is licensed under a Creative Commons Attribution 4.0 International License.