El Conceyu Bimenes propón un sistema de recuperación de vivienda rural pa solucionar el problema de la falta de llares disponibles a precios asequibles al tiempu que se frena’l desaniciu de los pueblos

Asturies vive una crisis habitacional ensin precedentes na qu’alcontrar vivienda o ser quien a pagala ye una de les mayores dificultaes del díi ente díi de la mayoría de los asturianos, torgando la emancipación de la mocedá ya’l desendolcu de proyeutos de vida o families. Al mesmu tiempu, paradóxicamente calcúlase qu’hai alredor d’800 aldegues o pueblos abandonaos, según datos citaos en distintos estudios y medios sobre despoblamientu rural. 

En cuanto a vivienda vacía, les últimes estimaciones del INE indiquen qu’Asturies supera les 100.000 viviendes desocupaes, con una cifra aproximada de 100.700 cases vacíes, lo que representa cerca del 15 % del parque residencial asturianu.

El problema ye especialmente grave nel mediu rural. Hai conceyos nos que más de la metá de les viviendes tán vacíes, como Bimenes, Somiedu, Quirós o Belmonte de Miranda. Precisamente n’un destos conceyos, Bimenes, ye onde surde una propuesta de solución perinteresante, presentada comu alegación al anteproyectu de la futura Llei d’Ordenación Integral del Territoriu d’Asturies (LOITA) y centrada en dar salida al grave problema de vivienda al tiempu que se fina col desaniciu de les cases vacíes, abandonaes o bloqueaes por conflictos d’herencies y problemes de titularidá.

La propuesta parte de la idea de que munchos pueblos asturianos tienen un importante parque de viviendes fora del mercáu, ensin posibilidá de rehabilitación nin usu, ente que cada vez hai más persones interesaes en vivir nel mediu rural. El conceyu considera que desbloquiar esi patrimoniu ye clave pa combatir el despoblamientu y favorecer el relevu xeneracional, torgando que la mocedá cole de los pueblos.

Pa ello, planteguen un cambiu de modelu, apostando pola “movilización pactada” frente a la expropiación clásica. Asina, l’alministración asumiría la rehabilitación de les viviendes deterioraes y la regularización de la so situación xurídica, ente que los propietarios cederíen temporalmente’l derechu d’usu del inmueble. Una vegada recuperada la inversión al traviés del alquiler, la vivienda volvería a los sos dueños en bon estáu.

Cuando nun fuera posible l’alcuerdu voluntariu, el conceyu propón que se pueda expropiar únicamente’l usufructu o derechu d’usu de les viviendes, ensin quitar la propiedá completa, cola intención de facilitar la recuperación d’inmuebles abandonaos con un menor coste públicu.

Otra de les midíes destacaes ye la creación de les llamaes “Zones d’Interés Residencial Rural” (ZIRR), espacios nos que los ayuntamientos podríen actuar prioritariamente pa recuperar vivienda vacía o en ruina y crear un “Bancu de Vivienda Rural Movilizada”.

La iniciativa tamién defende una gobernanza compartida ente ayuntamientos, mancomunidaes y entes públicos como VIPASA o SOGEPSA, cola fin de xestionar alquileres, rehabilitaciones y censos de vivienda vacía.