L’asociación Drechu a Morrer Dignamente Asturies reclama más formación pal personal sanitariu y una mayor información pública sobre los drechos al final de la vida, tres conocese l’informe añal de la Comisión de Garantíes y Evaluación sobre l’aplicación de la Llei Orgánica de Regulación de la Eutanasia n’Asturies

Llogu de l’asociación DMD

Dende la entidá consideren que, cinco años dempués de l’aprobación de la norma, sigue habiendo un déficit importante de conocencia social sobre la posibilidá d’acoyese a esti drechu. La preba, señalen, ye que les solicitúes nun esperimentaron un aumentu relevante y caltiénense en cifres baxes, lo que pa la organización podría indicar que munches persones nin siquier saben con claridá que pueden solicitar esta prestación sanitaria.

DMD Asturies tamién llama l’atención sobre’l llugar nel que se tán realizando la mayoría de los procedimientos. Según los datos conocíos, gran parte d’ellos desendólquense n’hospitales, anque les encuestes y estudios disponibles indiquen de manera reiterada que la mayoría de les persones preferiríen morrer na casa. Pa l’asociación, esti desfase amuesa que non siempres ta respetándose de manera efectiva la voluntá personal nel procesu final de la vida.

Especial esmolecimientu xenera la situación de les residencies. Nel periodu analizado rexistráronse nueve solicitúes procedentes d’estos centros, pero namái una llegó a materializase na propia residencia. Pa DMD Asturies, esti datu obliga a revisar si esisten torgues estructurales, falta de protocolos o resistencies institucionales que torguen exercer un drechu reconocíu pola llei.

La organización tamién reclama más claridá no que cinca a les patoloxíes de base de les persones solicitantes. Nel informe namái consten dos casos venceyaos a enfermedaes neurolóxiques y dengún casu psiquiátricu. L’asociación considera necesario conocer si esto se debe a falta de solicitúes o si, pelo contrario, pudieron producise negatives motivaes por interpretaciones restrictives de la capacidá de decidir o por posibles sesgos discriminatorios.

No que cinca al personal médicu, DMD Asturies destaca que la mayor parte de los médicos responsables y consultores fueron profesionales d’Atención Primaria. Esti datu, al so xuiciu, demuestra’l compromisu de la medicina de familia, pero tamién la necesidá d’estender la formación al conxuntu del sistema sanitariu. La entidá entiende que ye imprescindible evitar situaciones nes que la falta de preparación o d’información provoque reticencies a acompañar a una persona nel exerciciu del so drechu.

Pesi a les crítiques, l’asociación fai tamién una valoración positiva de dellos aspectos. Destaca que los tiempos y plazos de tramitación espeyaos nel informe resulten razonables y saluda’l xorreciente númberu de persones que rexistraron el documentu d’instrucciones previes. Amás, soraya como un avance relevante que, per primer vegada n’Asturies, se realizara una prestación derivada de lo dispuesto nun testamentu vital.

Sicasí, dende DMD Asturies entienden que queda camín per delantre. Reclamen siguir amenorgando los retrasos na designación del médicu responsable y conocer con mayor precisión les causes poles que dalgunes persones fallecen enantes de que se resuelva la so solicitú.

Pa l’asociación, la eutanasia nun pue quedar namái reconocida sobre’l papel. Pa ser un drechu real, tien de tar acompañada d’información clara pa la ciudadanía, formación suficiente pa los profesionales y garantíes efectives pa que cada persona pueda decidir con dignidá sobre’l final de la so vida.

This work is licensed under a Creative Commons Attribution 4.0 International License.