Más allá d’esti exerciciu concretu, la cuestión de la militarización del espaciu públicu sigue abierta n’Asturies. La presencia creciente de cuerpos armaos, anque seya en forma de simulacros, contribúi a redefinir -y non positivamente- la relación ente la ciudadanía y les instituciones

El Cabu Peñes va ser un de los escenarios bélicos

Esti miércoles, cuatro dies anantes d’un manifestamientu popular pola paz,  l’Armada Española despliega en Xixón l’exerciciu MARSEC-26, consideráu’l principal simulacru estatal de seguridá marítima. Les operaciones van desendolcase frente al Cabu Peñes y nel Puertu d’El Musel, implicando non solo medios militares, sinón tamién policiales y civiles.

El despliegue inclúi un ampliu abanicu d’unidaes: dende la Fuerza d’Acción Marítima hasta cuerpos policiales como’l Cuerpo Nacional de Policía, con grupos especializaos en intervención, control d’orde públicu o desactivación d’esplosivos.

Estos exercicios preséntense oficialmente como ferramientes d’“adiestramientu” y “coordinación institucional”. Sicasí, tamién supunxen una normalización de la presencia d’unidaes armaes en espacios civiles, incluyendo puertos, costes y entornos urbanos.

La combinación de militares, policía antidisturbios, unidaes especiales y medios aéreos nun contestu simuláu de crisis crea un escenariu onde la teoría de la “seguridá” va ganando terrén a la vida cotidiana.

La población vive esti tipu de despliegues con una mezcla de sorpresa, incomodidá y refuga abierta. La presencia visible d’armes, uniformes y operativos intensivos, especialmente nel actual entornu bélicu, xenera sensación d’inseguridá.

El discursu institucional fala de protección d’intereses marítimos, control del tráficu o respuesta ante riesgos; entantu la población entrúgase qué modelu de “seguridá” ta promoviéndose y a quién beneficia.