Los barrios de Xixón, especialmente los d’El Llano, Natahoyo y La Calzada, carecen los efeutos de la compra masiva de vivienda especulativa. La media de compraventes de vivienda en Xixón ye d’unes 3.000 al añu, pero agora mesmo l’stock cayó a pocu más de mil unidaes
La vivienda encarecióse un 20% namás nun añu en tou Xixón, la oferta ye escasa y la demanda foriata de vivienda copa’l mercáu. La diferencia de capacidá adquisitiva pente asturianos y los compradores europeos xuega en contra de los de casa, subiendo los precios que, mientres siguen siendo perbaxos pa economíes nortieuropees, son inasequibles pa bona parte del pueblu asturianu.
Ello ocurre per toa Asturies, siendo un fenómenu que dura ya décades n’algunes zones de costa y nos barrios más céntricos de les ciudaes. Sicasí, l’andaz avanza y aporta yá a los barrios más populares de Xixón, tradicionalmente obreros, que tan viendo como los precios xuben cuasique mes a mes mientres pierden vecinos a favor de pisos turísticos o segundes viviendes.
Esti fenómenu, conocíu comu xentrificación, ye una de les consecuencies de les polítiques que venden Asturies al meyor postor, priorizando les necesidaes y deseyos del visitante perriba de les de los asturianos y asturianes.
Nel Dos Santos
This work is licensed under a Creative Commons Attribution 4.0 International License.
