Dende XEGA (Colectivu LGTBI+ d’Asturies) convoquen a la manifestación del día 28 por mor del Arguyu 2025, baxo’l llema ‘¡Vergoña! 20 años depués ¡Asturies ensin llei LGTBI+!’

El colectivu torna a reclamar y desixir l’aprobación d’una llei autonómica LGTBI+ que permita qu’Asturies se ponga al día en drechos LGTBI+. Agora mesmo Asturies ye, xunto con Castiella y Llión, de los únicos territorios del Estáu que nun tienen entá una llei que garantice y protexa los drechos de la comunidá.

Amás, denuncien la fola reaccionaria de la estrema drecha y les sos consecuencies sobre’l colectivu LGTBI+, non solo nel ámbetu nacional y estatal, sinón tamién nes polítiques internacionales, apontando a la prohibición de manifestaciones n’Hungría, por casu, o a la negativa d’EEXX a reconocer la identidá de les persones trans.

Por ello faen un llamamientu a la participación a tola ciudadanía y al movimientu social asturianu pa defender los derechos humanos, los drechos sexuales, la diversidá sexual y la identidá de xéneru.

El manifestamientu, que pon el ramu a un mes apináu d’actividaes vindicatives, sedrá’l 28 de xunu y saldrá a les 18:00 h del Paseu de Begoña en Xixón, pa terminar na Plaza del Conceyu.

This work is licensed under a Creative Commons Attribution 4.0 International License.