Llucía F. Marqués

La chapucería repártese per dambes partes, los que’afirmando querer protexer l’asturianu salten tolos procedimientos y los que, queriendo dañar l’avance de los drechos llingüísticos, dan pesu llegal a la normativa que los defiende

El Plan de Normalización Llingüística del Conceyu Xixón, aprobáu nel Plenu municipal d’agostu de 2024 col votu favoratible de tola corporación municipal sacante Vox, queda ensin efeutos ‘polos sos vicios’, ello ye, pola chapucería cola que ta fechu. Falta l’informe económicu, ignórase na so ellaboración el procedimiento llegal al carecer de la consulta pública previa, falta la espublización del testu nel portal web y nun s’asoleyen les memories ya informes que conformen los espedientes d’ellaboración de los testos normativos. Falta tamién la intervención de la Xunta del Gobiernu llocal y nun ta incluyíu nel plan normativu anual. Tantos erros que da por pensar si ta mal fechu a costafecha pa facilitar les coses a quien quisiere baltalu o si a cencielles tenemos unos gobernantes destacables pola so inutilidá. Dengún de los grupos municipales que votaron a favor del mesmu avisaron d’estos defeutos de procedimientu y dengún d’ellos fexo na por que s’aplicase de manera efeutiva.

Sicasí, la intervención de la conceyala de VOX, Sara Álvarez Rouco, col so proverbial ascu a tolo qu’arrecienda a asturiano, nun dexa de tener les sos partes positives. Si, la sentencia un plan de normalización, que por cierto nun taba cumpliéndose y que -neso tienen razón- tien pocu pesu ensin la necesaria oficialidá. Pero faelo ensin entrar nel conteníu del Plan de Normalización Llingüística de Xixón, faciendo únicamente referencia a cuestiones técniques y de procedimientu, lo que refuercia la so validez en contenios.