Tres un aumentu d’accidentes llaborales graves en 2024, l’añu preslló con 21 finaos y 80 accidentes graves. En xineru de 2025, Asturies reportó una medría del 7,8% nos accidentes llaborales con baxa, algamando 976 casos. En mayu llevamos seis muertos, siete si consideramos el llabrador estrapáu pol so tractor, al que naide contabiliza como accidente llaboral
Asturies preslló los dos primeros meses de 2025 ensin rexistrar dengún accidente de trabayu con resultancia mortal, una meyora significativa respectu al mesmu periodu del añu anterior, cuando yá se contabilizara una víctima. Sicasí, esta meyora quedó rápido desaniciada en marzu cola tráxica muerte de cinco trabayadores na mina de Zarréu, lo que volvió poner nel focu la fraxilidá del sistema de prevención de riesgos llaborales.
Ayeri cayía una persona del techu nel polígonu industrial Bankunion 2, en Xixón, sumando unu más a la murnia llista. Ésti ye’l segundu accidente llaboral mortal rexistráu como tal n’Asturies no que va d’añu, tres el que’l pasáu 31 de marzu costó la vida a cinco trabayadores na mina de Zarréu cuando s’atopaben sacando carbón ensin que la empresa tuviera autorización pa estrayer mineral. Amás, un home finaba entartalláu pol so tractor, ensin qu’oficialmente se considere como accidente llaboral.
Tocantes a los accidentes asocedíos mientres la xornada llaboral, nel primer trimestre rexistráronse 1.677 accidentes con baxa médica, de los cualos 13 fueron clasificaos como graves. Unu de los datos más llamativos del periodu foi l’aumentu del 12 % nos accidentes in itinere, esto ye, aquellos carecios mientres los desplazamientos al trabayu o de regresu a la casa, una problemática amestada al mala traza de les nueses carreteres y al xorrecimientu de los accidentes de tráficu polo xeneral. En total, contabilizáronse 243 accidentes d’esti tipu ente xineru y febreru.
Nun podemos escaecer tampoco que, según la investigación qu’agora mesmu ta desenvolviendo’l Principáu, hai miles d’accidentes llaborales y n’itínere que nun se tán tramitando como tales, nun intentu de les empreses d’azorronar les condiciones de precariedá llaboral a les qu’esponen a los sos emplegaos p’aforrase la inversión en protección y seguridá llaboral.
L’ausencia de prevención de riesgos llaborales y les condiciones de precariedá nel trabayu nun se llinda a la empresa pública. Acordies los datos recoyíos pol Institutu Asturianu de Prevención de Riesgos Llaborales, la mesma alministración asturiana incumple la llexislación en materia de prevención de riesgos llaborales.
Entantu, siguen cayendo tolos muertos nel mesmu bandu.
Nel Dos Santos
This work is licensed under a Creative Commons Attribution 4.0 International License.
