La Fundación Belenos, dedicada a la recuperación, caltenimientu y promoción de la cultura asturiana, vien de poner en marcha una nueva páxina web cola intención de reforzar la so presencia dixital y facer accesible al públicu xeneral el so trabayu y los sos recursos
La nueva plataforma, que puede visitase en fundacionbelenos.com ufierta conteníos sobre la historia de la fundación, les sos actividaes, espublizaciones -que puen mercase dende la páxina web- y actualidá y a ella van dir amestando pali que pali más materiales cola historia de Belenos, artículos, semeyes, etc. que nun salen na revista en papel. La páxina ta diseñada pa ser accesible dende cualquier tipu de dispositivu, con un enfoque visual prestosu.
La Fundación Belenos vien furrulando dende 1983, cuando se creó col nome de Coleutivu d’Estudios Etnográficos Belenos. Surdió del esfuerciu d’un grupu de persones que, viendo que munchos aspectos de la cultura tradicional asturiana taben en riesgu de desapaecer, entamaron a recoyer, estudiar y guardar esa memoria del país anantes de que se perdiere del tou.
Col tiempu, esa iniciativa tomó forma colectiva y, en 1998, convirtióse oficialmente nuna fundación. El so propósitu principal sigue siendo’l mesmu: estudiar, conservar y esparder la cultura asturiana en toles sos formes, con especial atención a la tradición popular y al patrimoniu célticu que compartimos con otros pueblos hermanos. Y así lo lleven faciendo ensin parar dende va más de cuarenta años.
Susana Sela
This work is licensed under a Creative Commons Attribution 4.0 International License.
