El sindicatu SUATEA  denuncia la grave situación que ta viviéndose en dellos centros educativos d’Asturies por cuenta de la falta de cobertoria de baxes de profesoráu en delles especialidaes “La educación pública nun pue siguir furrulando con parches improvisaos que castiguen al alumnáu y precarizan al profesoráu”.

Esti caberu trimestre nun  tán cubriéndose con personal interín abondes de les sustituciones de profesores, afectando a asignatures como Matemátiques, Tecnoloxía, Llatín, Griegu y, dende va dos selmanes, tamién a Música, too ello pesi a qu’esisten persones disponibles nes llistes d’interinidá.

La consecuencia directa d’esta situación ye que centenares d’estudiantes lleven selmanes ensin recibir clases en delles materies, lo que constitúi una vulneración del so drechu a la educación y ye especialmente grave pa l’alumnáu de segundu de bachilleratu, qu’enfrenten la EBAU en menos d’un mes ensin recibir la correspondiente formación.

Como ye vezu, la repercusión nun foi mayor gracies al voluntarismu del profesoráu asturianu, que, en munchos centros, ta reorganizándose de forma interna pa que los escolinos nun queden abandonaos dafechu. Dellos departamentos tán redistribuyendo horarios pa impartir clase n’hores llibres, aumentando de baldre la so xornada llaboral. 

Dende SUATEA achaquen esti problema a “la llaceriosa planificación per parte de la Conseyería d’Educación, qu’aprueba plantiyes orgániques insuficientes, col votu en contra de toles organizaciones sindicales, y sofítase nun sistema de cobertoria con personal interino, que representa yá un 25% del total del profesoráu”.

Susana Sela

This work is licensed under a Creative Commons Attribution 4.0 International License.