Venti fotógrafos de Rusia, que trabayen en distintos xéneros, xuníos nel “StarPath” Photo Club presentaron ayeri una colección combinada d’obres sol títulu ‘Algamar la Lluna’
La esposición, que pue vese na sala FIAC de la Pinacoteca Eduardo Úrculo, de Llangréu, presenta semeyes tomaes n’estremaos xéneros, pero toes elles traten sobre la guapura de les persones y la natura, sobre’l valir de ca momentu de les nueses vides y sobre l’amor pola fotografía, que xune’l nuesu mundu.
Ente los fotógrafos atópense galardonaos y ganadores de dellos premios internacionales y concursos, incluyíos los más renombraos, como 35 ADWARDS. Munchos d’ellos tienen les importantes distinciones AFIAP y EFIAP de la Federación Internacional de Fotografía.
Un llugar especial ente les obres presentaes ocúpalu les semeyes de reciella. “A lo último, los neños son los que saben esfrutar de les coses cencielles y coles mesmes creen nos milagros más increyíbles. Los sos suaños son puros ya ensin llendes: facer amigos, consiguir un gatín, abrazar a la so ma, ver la mar, llegar a la lluna…”
Los autores declaráronse bien contentos de tener la oportunidá d’amosar el so trabayu a los espectadores asturianos ya intercambiar esperiencies con colegues, “una escelente manera d’aprender más sobre cómo viven, qué esfruten y qué esperimentaron persones en distintes partes de la nuesa Tierra. Creemos qu’el nuesu mundu puede faese más atentu y rellumante si se saquen semeyes y se muestren los momentos más pervalibles de les nueses vides”.
Susana Sela
This work is licensed under a Creative Commons Attribution 4.0 International License.
