Esti vienres 24 la Casa’l Chinu de Cimavilla acueye un actu solidariu nel que va proyectase’l videoclip del tema ‘Nun ye delitu’, nel que participen dellos renomaos artistes de la escena musical asturiana

El vienres a les siete de la tarde va tener llugar l’actu de presentación del cantar ‘Nun ye delitu’, el tema col que dellos artistes de la música del país apurren el so sofitu a les sindicalistes represaliaes, condergaes por defender nel añu 2017 los derechos d’una compañera frente al acosu llaboral y sexual al que la sometía el propietariu de la yá presllada Pastelería La Suiza. La persecución a l’acción sindical acomuñó dende’l primer momentu centenes d’amueses de solidaridá, non solo per parte de la sociedá asturiana sinón tamién a nivel internacional, recibiendo’l sofitu de munches estayes de la sociedá asturiana, incluyendo l’ámbitu musical. El 24 de febreru van dar un pasu más presentando esti cantar y estrenando’l videoclip nun actu nel qu’intervendrán dellos de los artistes participantes y nel qu’habrá sesión musical acústica. ‘Nun ye delitu’ va llanzase’l sábadu 25 en toles plataformes musicales. El de les 6 de La Suiza ye ún de casos los más graves de persecución a l’acción sindical nos últimos años, tando condergaes a tres años y mediu de cárcel y pagar una multa de más de 125.000 euros.