El X congresu euru-americanu Rehabend 2024 va tener llugar del 7 al 9 de mayu en Llaboral Ciudá de la Cultura. La ocasión ye perbona pa que l’alministración xixonesa y asturiana garre apuntes y entame a curiar del padremuñu asturianu tanto material comu inmaterial
El X congresu euru-americanu sobre Patoloxía de la Construición, Teunoloxía de la Remocicamientu y Xestión del Padremuñu (Rehabend 2024) va desendolcase en Xixón del 7 al 9 de mayu. Va ser en Llaboral Ciudá de la Cultura y va aconceyar a 337 espertos na materia: profesores, catedráticos y doctores del ámbitu de la edificación, construición, remocicamientu y xestión del padremuñu d’universidaes europees, de México, Perú, Uruguay, Arxentina, Brasil, EEXX…
Esti congresu ta entamáu pol grupu de Teunoloxía de la Edificación de la Universidá de Cantabria y la estaya d’Inxeniería de la Construición de la EPI Xixón (Universidá d’Uviéu). Na presentación, celebrada güei en Xixón, afayáronse Ángela Pumariega Menéndez, vicealcaldesa de Xixón y conceyala d’Economía, Emplegu, Turismu y Anovación; Alfonso Lozano Martínez-Luengas, direutor del congresu pela parte de la Universidá de’Uviéu; ya Ignacio Lombillo Vozmediano, direutor del congresu pela parte de la Universidá de Cantabria.
La Patoloxía de la Construición, la Teunoloxía del remocicamientu y la Xestión del Padremuñu tienen anguañu una gran importancia nel sector de la construición. Poro, los organizadores propunxeron esti eventu téunicu en Xixón. El congreso va amosar los avances algamaos nos dos años últimos tanto nel conocimientu teóricu como na práutica nestes materies y va aconceyar al rodiu de 275 contribuciones téuniques de profesionales, académicos y especialistes de más de 30 países.
El congresu Rehabend 2024 cunta col sofitu del Gobiernu d’España, el Principáu d’Asturies, el Conceyu de Xixón, Llaboral Ciudá de la Cultura, Xixón Convention Bureau, Grupo Puma, Mapei, Sika, Tecnalia, la Universidá de Cantabria y la Universidá d’Uviéu.
La inauguración del congresu va celebrase’l martes 7 de mayu a les 12h en Llaboral Ciudá de la Cultura.
Llucía F. Marqués
This work is licensed under a Creative Commons Attribution 4.0 International License.
