Conseyería respuende con policia a les families que reclamaben un comedor escolar asequible, ante l’incrementu que yos fae pagar más de 170 € al mes por rapacín
Les families de los escolinos del CP José Bernardo de Llangréu y Vega de Guceo de Turón empreslláronse ayeri na Conseyería d’Educación pa protestar pol desaxeráu aumentu del preciu del comedor escolar. La rempuesta de la Conseyería foi mandar a la policía a desagospialos.
Tres de la quiebra de la fasta entós empresa axudicataria de los menús escolares, subióseyos el preciu diariu del mesmu tres euros (más de 60€ mensuales), quedando el preciu a 8’25 €, ello ye, alrodiu los 170 € al mes por rapacín.
Les families recoyeron y entregaron en Conseyería más de 1.500 robles pa desixir que s’igüe esti problema. Amás, comu midía de presión un grupu de pas y mas empresllábase ayeri en representación del conxuntu de les families afeutaes, cola intención d’aconceyar colos responsables y buscar una solución al problema. La rempuesta de la Conseyera, aparte de decir que “si van al comedor ye voluntariamente” añadiendo que queda poco cursu y ya s’iguará daqué pal añu que vien, foi utilizar la violencia pa sacar a les families del edificiu.
Ante esta rempuesta policial desmidía, les families piden la dimisión darréu de la Conseyera y casu de nun dimitir voluntariamente, desixen a Barbón que la destituya.
Llucía F. Marqués
This work is licensed under a Creative Commons Attribution 4.0 International License.
